Павлодар облысында сотталғандармен жүйелі жұмыс жүргізілуде, — деп хабарлайды Polisia.kz.
№45 мекемесінде адамның түзелу жолы оның еңбекке, қоршаған ортаға және өзіне деген көзқарасын өзгертуден басталады деп есептейді. Сондықтан мұнда сотталғандардың жазасын өтеумен қатар, пайдалы дағдыларын дамытуына, өз қабілеттерін ашуына және қоғамға қайта оралуына дайындалуына мүмкіндік беретін жағдайлар жасалған.
Қайта әлеуметтендірудің негізгі бағыттарының бірі – еңбек. Сотталғандар өндірістік аймақтарда жұмыс істеп, кәсіби дағдыларды меңгереді, жауапкершілікке, тәртіпке және адал еңбектің құндылығын түсінуге үйренеді.
Шығармашылыққа да ерекше көңіл бөлінеді. Сотталғандардың бірқатары сурет салумен айналысып, өнер арқылы өз ойлары мен сезімдерін жеткізеді. Шығармашылық ішкі күйзелісті жеңілдетіп, қиялды дамытып, оң көзқарас қалыптастыруға ықпал етеді.
Интеллектуалдық дамуға да назар аударылады. Сотталғандар шахмат ойнап, логикалық ойлау, сабырлылық пен дұрыс шешім қабылдау қабілеттерін жетілдіреді. Сонымен қатар кітапханаға барып, көркем және танымдық әдебиеттер оқып, білім көкжиегін кеңейтеді.
Еңбек, шығармашылық және тәрбие жұмыстарына негізделген кешенді тәсіл сотталғандарға өмірлік құндылықтарын қайта қарауға, пайдалы дағдыларды қалыптастыруға және бостандыққа шыққаннан кейін заңға бағынатын өмірге сенімді қадам жасауға көмектеседі.
Мекемеде атап өткендей, қылмыстық-атқару жүйесінің басты міндеті – жазаны орындауды қамтамасыз етумен қатар, адамның өзгеруіне, өз қателіктерін түсінуіне және қоғамға толыққанды азамат ретінде қайта оралуына жағдай жасау.
