Павлодар полицейлері көші-қон заңнамасын бұзудың 226 фактісін анықтады, – деп хабарлайды Polisia.kz.
Заңсыз көші-қонға және адам саудасына қарсы іс-қимыл мақсатында 27 маусым мен 4 шілде аралығында Павлодар облысының аумағында «Нелегал-2022» жедел-алдын алу іс-шарасы өтті.
Аталған іс-шараны өткізу кезеңінде көші-қон полициясымен Қазақстан Республикасында болу ережелерін бұзған 410 шетелдік анықталып, әкімшілік жауапкершілікке тартылды, оның ішінде бір алыс шетел азаматы және ТМД елдерінің 409 азаматы.
– Соттарға 226 әкімшілік материал жолданды. Оларды қарау нәтижелері бойынша ТМД-ның 26 азаматына қатысты елден шығарып жіберу туралы шешімдер қабылданды. 195 шетел азаматының Қазақстан Республикасында уақытша болу мерзімі қысқартылды. Сонымен қатар, шетелдік жұмыс күшін заңсыз пайдаланудың 32 фактісі анықталды. Барлық фактілер бойынша шетелдіктерді жұмысқа заңсыз жалдаған жұмыс берушілер ҚР ӘҚБтК-нің 519-бабы бойынша әкімшілік жауапкершілікке тартылды. Павлодар ПБ қабылдау-тарату орнына жеке басын анықтау үшін 5 азамат қамауға алынды, – деді Павлодар облысы ПД бастығы Василий Скляр.
Шетелдіктердің Қазақстан Республикасында болуының белгіленген ережелерін сақтамағаны үшін ҚР ӘҚБтК-нің 518-бабы бойынша Қазақстан Республикасының 186 азаматы әкімшілік жауапкершілікке тартылды.
Мысалы, Павлодар қаласы, 2-ші Советов көшесі бойында салынып жатқан үйде құрылыс салушы ретінде еңбек қызметін тиісті рұқсатсыз жүзеге асырған Өзбекстанның 8 азаматы анықталып, ұсталды. Тәртіп бұзушылар ҚР ӘҚБтК-нің 517-бабы 5-бөлігі бойынша жауапкершілікке тартылды. Жұмыс берушіге қатысты ҚР ӘҚБК 519-бабы бойынша әкімшілік материал жасалды.
Алдын алу іс-шарасы барысында құқықтық тәртіп сақшылары іздеуде жүрген 5 қылмыстық қылмыскерді анықтады. Мәселен, іздеуде жүрген 43 жастағы қылмыстық қылмыскер, Беларусь Республикасының азаматы, Беларусь Республикасы Қылмыстық кодексінің 174-бабының 3-бөлігінде көзделген қылмыстық қылмыс жасады деп айыпталған.
