Павлодарда полицейлер құқықтық тәртіпті күшейтуде, - деп хабарлайды Polisia.kz.
Павлодар қаласында құқықтық тәртіп пен тұрғындардың қауіпсіздігін қамтамасыз етуге бағытталған жұмыс күн сайын қарқынды түрде жүргізілуде. Биылғы жылдың басынан бері тәртіп сақшылары 37 мыңнан астам құқық бұзушылықтың жолын кесіп, қоғамдық тыныштықты сақтауға өз үлесін қосты.
Өткен тәуліктің өзінде 320 құқық бұзушылық анықталып, оның ішінде жол қауіпсіздігіне қатысты 273 заң бұзушылыққа тосқауыл қойылды. Мәселен, 110 жүргізуші жылдамдықты асырса, 54 жаяу жүргінші жолды рұқсат етілмеген жерден кесіп өткен. Бұған қоса бірнеше жүргізуші алкогольдік масаң күйде көлік басқарғаны үшін жауапкершілікке тартылды.
Полиция қызметкерлері Нұрсұлтан Назарбаев даңғылы, Нұрмағамбетов, Генерал Дүйсенов, Қатаев және Бекхожин көшелерінде күдікті көліктерді тоқтатып, олардың жүргізушілерін медициналық тексеруден өткізді. Тексеру нәтижесінде барлық жүргізушілердің масаң күйде екені анықталды. Заң бұзған азаматтарға қатысты материалдар сотқа жіберілді.
Патрульдік полиция бөлімшесі қоғамдық тәртіпті сақтауда негізгі рөл атқарады. Қызметкерлер тәулік бойы құқық бұзушылықтармен күрес жүргізіп, қылмыстарды дер кезінде ашуға тырысады. "Заң және тәртіп" қағидаты полиция қызметінің басты негізі болып қала береді.
Тәртіп сақшыларының сапалы жұмыс атқаруы үшін ішкі тәртіпті сақтау аса маңызды. Әр ауысым алдында қызметкерлерді тарату шарасы өткізіліп, автокөліктердің техникалық жағдайы, қызметкерлердің дайындық деңгейі мен арнайы жабдықтары тексеріледі. Бұл тек заңдылықты нығайтып қана қоймай, халықпен өзара тиімді байланыс орнатуға да септігін тигізеді.
Патрульдік полиция қызметінің маңыздылығы Павлодар тұрғындарының құқықтық тәртібі мен қауіпсіздігін қамтамасыз етуде айқын көрінеді. Құқық қорғаушылардың жанқиярлық еңбегі қоғамдағы тұрақтылықтың негізі болып табылады.
