Петропавлда 22 жастағы тұрғын аса ірі мөлшердегі синтетикалық есірткімен ұсталды, – деп хабарлайды Polisia.kz.
Петропавл қаласының орталығында синтетикалық есірткіні жасырын жерге салып кету арқылы таратқан 22 жастағы азамат күдікке ілінді. СҚО ПД есірткі қылмысына қарсы іс-қимыл басқармасының қызметкерлері оны Мичурин көшесінде ұстады. Жігіттен ұнтақ тәріздес затпен 36 полимерлік түйіншек тәркіленді. Сараптама қорытындысына сәйкес, 21 түйіншекте мефедрон психобелсенді заты, 15 данасында “тұз” деп аталып жүрген α-PvP заты болғаны анықталды. Алынған синтетикалық есірткілердің жалпы салмағы 28,08 грамды құрады, бұл аса ірі мөлшерге жатады.
Аталған факті ҚР ҚК-нің 297-бабының 3-бөлігі бойынша сотқа дейінгі тергеп-тексерулердің бірыңғай тізілімінде тіркелді. Қазіргі уақытта іс материалдары сотқа жіберілді.
– Есірткінің таралуына қарсы күрес – полиция жұмысындағы басты басымдықтардың бірі. Жыл басынан бері облыста есірткі сатты деген күдікпен 35 адам ұсталды. Тәжірибе көрсеткендей, орта есеппен бес есірткі таратушының төртеуі синтетикалық есірткімен айналысады. Естеріңізге сала кетейік, ҚР ҚК-нің 297-бабының санкциясына сәйкес өткізу мақсатында есірткі сақтағаны үшін 10 жылға дейін, ірі мөлшерде – 12 жылға дейін, аса ірі мөлшерде 15 жылға дейін бас бостандығынан айыру жазасы көзделген, – дейді СҚО ПД есірткі қылмысына қарсы іс-қимыл басқармасының бастығы полиция подполковнигі Иван Терзиди.
