Өскемен қаласында жергілікті тұрғын көлікті есірткілік масаң күйде басқарғаны үшін әкімшілік жауапкершілікке тартылды, — деп хабарлайды Polisia.kz.
Патрульдеу кезінде полиция қызметкерлері KIA Optima автокөлік жүргізушісін байқап, тексеру үшін тоқтатқан. Көлік тізгінінде 39 жастағы ер адам болған. Тексеру барысында жүргізуші медициналық куәландырудан өтті. Оның каннабиноидтерді қолдану салдарынан есірткілік масаң күйде болғаны расталды.
Сот шешімімен ер адам ҚР ӘҚБтК-нің 608-бабының 1-бөлігі бойынша әкімшілік жауапкершілікке тартылды. Оған 15 тәулікке әкімшілік қамаққа алу және көлік құралдарын басқару құқығынан жеті жыл мерзімге айыру жазасы тағайындалды.
Көлік құралын алкогольдік, есірткілік немесе уытқұмарлық масаң күйде басқаруға жол берілмейді. Мұндай әрекет жол қозғалысына қатысушылардың өмірі мен денсаулығына қауіп төндіреді. Жүргізушілер осыған ұқсас құқық бұзушылықтар үшін заңда көзделген жауапкершілік бар екенін ұмытпауы тиіс.
“Заң мен тәртіп” қағидаты баршаға ортақ.
