ШҚО аудандарында халықаралық фестивальдің қауіпсіздігін қамтамасыз ету қорытындылары шығарылып, жеке құрам тәртіпті нығайтуға бағдарланды, – деп хабарлайды Polisia.kz.
"Алтай – түркі әлемінің алтын бесігі" халықаралық фестивалі сәтті аяқталғанына да екі аптаға жуық уақыт өтті. Мыңдаған қонақты жинаған ауқымды халықаралық іс-шара артта қалғанымен, оның сәтті қорытындылары ішкі істер органдарының үйлесімді жұмысының бағдары ретінде қызмет етуін жалғастыруда.
Атқарылған жұмысқа терең талдау жасау мақсатында Шығыс Қазақстан облысы полиция департаменті бастығының орынбасары Серік Манапов өңірдің шығыс аймақтарына – Алтай, Үлкен Нарын, Катонқарағай, Күршім және Самар аудандарына жұмыс сапарымен барып қайтты. Ол жергілікті жерлерде аудандық бөлімшелердің жеке құрамымен бірқатар жұмыс кеңестерін өткізді.
Кездесудің басты тақырыбы фестиваль күндері құқықтық тәртіпті қамтамасыз етілуін бағалау болды: сақшылардың алдын алу және кәсіби шараларының арқасында ауқымды мәдени шара ешқандай төтенше оқиғалар мен құқық бұзушылықтарсыз, толықтай тыныш жағдайда өтті.
Жұмыс кеңестері тек өткен жетістіктерді талдаумен шектелген жоқ. Сапар барысында жеке құрамға Қазақстан Республикасының Жаңа Конституциясының негізгі ережелері мен «Заң және тәртіп" қағидатының түйінді талаптары егжей-тегжейлі жеткізілді.
Серік Манапов атап өткендей, бұл стратегиялық бағыттар заңды сөзсіз нығайтуға, қатаң қызметтік тәртіпке және халықтың полицияға деген сенiмін арттыруға бағытталған. Азаматтармен тиімді профилактикалық жұмыстарды дамытуға, кәсіби әдепті қатаң сақтауға және қоғаммен ашық диалог орнатуға ерекше назар аударылды.
– Әрбір форманың, шен мен өкілеттіктің артында әрқашан адам тұруы тиіс. Азаматтардан алынатын ең құнды кері байланыс – бұл олардың "Мені естіді, маған көмектеседі, мен қорғалғанмын" деген сөздері, – деп атап өтті департамент бастығының орынбасары.
Әрбір ауданға жасалған жұмыс сапарларының қорытынды кезеңі марапаттау рәсіміне ұласты. Халықаралық форумды өткізу кезеңінде жоғары кәсібилік, қызметтік борышын үлгілі атқарғаны және қауіпсіздікті тиімді қамтамасыз еткені үшін ерекше көзге түскен полиция қызметкерлері ведомстволық наградалармен және алғыс хаттармен салтанатты түрде марапатталды.
Мұндай көшпелі кездесулер жергілікті жерлердегі жедел жұмыстың жоғары стандарттарын нығайтып қана қоймай, жеке құрамды заң мен халыққа мінсіз қызмет етуге жігерлендіреді.
