СҚО-да іздеудегі қылмыскер масаң күйінде такси рөлінде ұсталды, – деп хабарлайды Polisia.kz.
Қылмыскерлерді іздестіру – полиция жұмысындағы маңызды бағыттардың бірі. Оларды іздеуге халықпен қарым-қатынас жасайтын барлық қызметтер тартылады.
27 наурыз күні түнде Шал ақын ауданында патрульдік полиция тобының қызметкерлері тексеру мақсатында таксиді тоқтатқан. Рөлде отырған жігіттен спирттік ішімдіктің иесі сезілген. Медициналық куәландыру оның масаң күйде болғанын көрсетті. Анықталғандай, ол Қызылжар ауданының 27 жастағы тұрғыны болып шыққан. Көлік жүргізу құқығы жоқ тұрғын таксиде жолаушы ретінде келе жатып, жүргізушіден рөлге отыруға сұранады. Абырой болғанда, көлік апаты орын алған жоқ.
Аудандық сот шешімімен ҚР Әкімшілік құқық бұзушылық туралы кодексінің 608-бабы бойынша: біреуіне – көлікті масаң күйде басқарғаны үшін 20 тәулікке қамауға алу, екіншісіне – көлік құралын масаң күйдегі адамның басқаруына бергені үшін 15 тәулікке қамауға алу түріндегі жаза тағайындалды.
– Аталған азамат шартты-мерзімінен бұрын босату режимін ұдайы бұзғаны үшін пробация қызметі желісі бойынша іздеуде жүр. Бұдан бөлек, үш алаяқтық бойынша Екінші полиция бөлімі қызметкерлерінің күдігіне іліккен. Тергеу оның басқа да қылмыстарға қатысын тексереді, – деді аудандық полиция бөлімінің бастығы Руслан Мұхамбетжанов.
Жалпы жыл басынан облыс полицейлері 14 қылмыскерлерді іздеп тапты.
