ТЖ аймағындағы 800-ге жуық ұландық Атырау облысындағы су тасқынының салдарымен күресуге көмектесіп жатыр, – деп хабарлайды Polisia.kz.
Қазақстан Премьер-министрі Олжас Бектенов Мемлекет басшысы Қасым-Жомарт Тоқаевтың тапсырмаларын орындау аясында Атырау облысында су басу қауіпін азайту үшін қабылданып жатқан шаралардың барысын тексерді. Батыс Қазақстан облысында су тасқыны шарықтағаннан кейін су тасқыны өзен арнасы бойымен Атырау облысына қарай жылжып, Каспий теңізіне құяды. Тексеру қорытындысы бойынша Үкімет басшысы күш-жігерді арттыруды тапсырды және су тасқыны жағдайы тұрақтанған өңірлерден Атырау облысына әскери қызметшілер мен техниканы жедел көшіруді қамтамасыз ету керектігін айтты.
Бүгінгі күні Ұлттық ұланның әскери қызметшілері полиция қызметкерлерімен және құтқарушылармен бірлесіп су тасқыны салдарын жоюды жалғастыруда, сондай-ақ олар су тасқынына қарсы іс-шараларды – еріген суларды айдау, инертті материалдары бар қапшықтарды төсеу, су айдындарының жағалауды нығайту жұмыстары, каналдар мен арық жүйелерін тазарту, адамдарды хабардар ету және эвакуациялау жұмыстарын жүргізіп жатыр.
Мәселен, қазіргі уақытта Атырау облысында 5546 (Атырау қ.) және 5451 (Қарағанды қ.) әскери бөлімдерінен 800-ге жуық ұландықтар тартылды. Бұдан басқа, 6506 әскери бөлімінің (Шымкент қ.) 300 әскери қызметшісі және 5547 әскери бөлімінің (Қызылорда қ.) жеке құрамының 200 адамы Батыс Қазақстан облысында жағалауды нығайту жұмыстарына, қапшықтарды дайындауға және салуға көмектеседі. Сонымен бірге, 5517 әскери бөлімінің (Орал қ.) 80 әскери қызметшісі патрульдік-бекеттік қызмет атқарады. Тағы 300-ге жуық сарбаз су тасқынына қарсы іс-шараларда жергілікті халыққа көмек көрсетеді.
Айта кету керек, 6655 әскери бөлімінің жеке құрамы (Ақтөбе қ.) – 400-ге жуық әскери қызметші патрульдік-бекеттік қызмет атқарады. Ұландықтар күндіз-түні су басқан аумақтарда болады. Қауіпсіздік мақсатында сарбаздар азаматтарды су басқан үйлерге жібермейді. Әскери қызметшілер тонау әрекеттерін болдырмау үшін бар күшін салады.
Су тасқыны салдарын жоюға Қостанай және Солтүстік Қазақстан облыстарының қалалары мен кенттерінде 6697 (Қостанай қ.) және 6637 (Петропавл қ.) әскери бөлімдерінің әскери қызметшілері, ҚР Ұлттық ұланы Петропавл академиясының курсанттары белсенді қатысады. Оларға елордалық жедел бригаданың тәртіп сақшылары көмекке жіберілді. Жалпы алғанда, солтүстік аймақтардағы Ұлттық ұланның күштер тобы шамамен 400 адамды құрайды.
Жалпы, су басқан өңірлерде салдардың алдын алу және жою үшін полицейлермен, құтқарушылармен және еріктілермен бірлесіп су тасқынына қарсы іс-шараларға белсенді қатысатын 3 мыңнан астам құқықтық тәртіп әскері тартылды. Ұландықтар 120-дан астам автомобиль техникасы мен 7 әуе кемесін пайдаланады, 1769 адам эвакуацияланды, ұзындығы 100 км жағалауды нығайту жұмыстары жүргізілді, 1 млн 192 мың қап дайындалып, төселді, су тасқыны орындарына 140 тоннаға жуық гуманитарлық жүк жеткізілді және 1100 тоннадан астам жүк түсірді.
