Таразда қызметтік ит 5 келідей есірткіні табуға көмектесті, – деп хабарлайды Polisia.kz.
Бүгінде Жамбыл облысы Полиция департаментінің кинологиялық қызмет орталығында 50 қызметтік полиция иті, оның ішінде неміс, бельгиялық және орта-азиялық қойшы иттері, лабрадорлар, спаниельдері бар 12 кинолог жұмыс істейді. Әр итпен қызметтің басынан аяғына дейін жұмыс істейтін кинолог бекітілген.
Қызметтік иттер күшік кезінде алдымен бастапқы жалпы білім беру жаттығуларынан өтеді, содан кейін болашақ мамандыққа сәйкес келетін жоғары деңгейге ауысады.
Әр иттің өздеріне тиісті машықтанған мамандануы бар. Иттер негізгі алты бағытқа бөлінген: із кесу жұмыстары, жарылғыш заттарды, есірткі құралдарын іздеу және табу, сараптамалық-криминалистикалық басқарма желісі бойынша (қылмыс орнында алынған иістерді одорологиялық іріктеу) жұмыс, қарауылдық, сондай-ақ патрульдік қызмет атқаратын иттер.
Күн сайын иттер полицияға қылмыстың алдын алуға және ашуға көмектеседі, азаматтардың тыныштығын күзетеді, қаланы тәртіп сақшыларымен бірге күзетеді.
– Жыл басынан бері Жамбыл облысы ПД кинологиялық қызметінің мамандары қызметтік иттердің көмегімен 61 қылмысты ашты, 500 келіден астам есірткі заты тәркіленді, – деді Жамбыл облысы ПД кинологиялық қызметінің бастығы Юрий Наливкин.
Осы айда 5 жасар Барон атты бельгиялық ит ерекше көзге түсті, ол өз қызметін 2019 жылы Жамбыл облысы Полиция департаментінің Кинологиялық қызмет орталығында бастаған. Ол туылған сәтінен бастап кіші кинолог-инспекторы Ержан Көпековке бекітіліп, есірткі заттарын іздеуге үйретілді. Қазір кинолог итпен бірге Қордай ауданында қызметтік іссапарда жүр және 5 келіге жуық есірткі затын тапты.
Мысалы, 6 шілдеде қызметтік-іздестіру итінің назарына Mercedes автокөлігі түсті. Көліктің жолаушылар отыратын салонын тексеру кезінде Барон 2,7 келіден астам марихуана бар оралған пакетті белсенді түрде белгілей бастады. Келесі күні Баронның назары Volkswagen автокөлігінің жүк бөлігіне түседі, оны тексеру кезінде 2,1 келіден астам гашиш табылды.
Осындай үздік қызметтері үшін кіші инспектор-кинолог Ержан Көпеков пен қызметтік-іздестіру иті Барон алғыс хатпен және медальмен марапатталды.
