Түркістандық полицейлер төтенше жағдайды бұзудың бес жайтын анықтады, – деп хабарлайды Polisia.kz.
Мемлекет басшысының қаулысымен 16 наурыз бен 15 сәуір аралығында республикамызда төтенше жағдай жарияланған болатын. Осыған сәйкес Түркістан облысының полицейлері күшейтілген режимде жұмыстарды атқарып, арнайы рейдтік жұмыстарды жүргізіп жатыр.
Рейд барысында Түркістан облысы Жетісай ауданында төтенше жағдай режимін сақтамаудың бес жайты анықталды.
Жетісай қаласындағы ойынханалардың бірі түнгі уақытта азаматтарды қабылдап, сақтық шараларын ұстанбай қызмет көрсетіп отырған. Одан кейінгі жайттар үш күн ішінде қатарынан ұйымдастырылған үш беташар тойы. Полицейлердің тұрақты түрдегі қадағалауының нәтижесінде
төтенше жағдайды бұзып, адамдардың басын қосып жиын ұйымдастырған үш тұрғын Жетісай ауданының тұрғындары анықталды. Бесінші жайт, қала аумағындағы дәмханаларды тексеру кезінде орын алды. Төтенше жағдайдың талаптарына сәйкес, шектеулерді ескерместен қала аумағындағы дәмхана иесі тұрғындарға қызмет көрсетіп келген.
Жоғарыдағы бес жайтқа байланысты Жетісай аудандық полиция бөлімінің полицейлері ҚР Әкімшілік құқық бұзушылық туралы кодексінің 476-бабы (төтенше жағдай режимін бұзу) бойынша хаттамалар толтырды. Үш жайтқа байланысты соттың шешімімен айыппұл салынса, қалған жайттарға сәйкес тергеу амалдары жүргізіліп жатыр.
Облыс полицейлері ескертеді: төтенше жағдай кезінде заң талаптарына сәйкес әрекет етіп, мүмкіндігінше сақтық шараларын ескеріп, медицина мамандарының айтқан ережелерін де қатаң ұстанған дұрыс. Әрбіріміз мұндай шаралардың атқарылып жатқандығы ең алдымен өз қауіпсіздігіміз үшін маңызды екенін ұмытпайық.
