Түркістан облысында “Пиротехника” республикалық жедел-профилактикалық іс-шарасы басталды, – деп хабарлайды Polisia.kz.
Ағымдағы жылдың 15 желтоқсаны мен 2021 жылдың 7 қаңтары күндері аралығында Түркістан облысының аумағында полиция қызметкерлері жеке және заңды тұлғалардың пиротехникалық заттар мен олар қолданылып жасалған бұйымдар айналымының белгіленген қағидаларын сақтауына бағытталған “Пиротехника” жедел-профилактикалық іс-шарасын өткізуде. Аталған іс-шараға Түркістан облысы ПД Әкімшілік полиция басқармасының қызметкерлері, Жергілікті полиция қызметі және Түркістан облысы ТЖД Азаматтық қорғау өкілдері жұмылдырылды.
Тәртіп сақшылары “Пиротехника” жедел-профилактикалық іс-шарасы кезінде сатушылардың пиротехниканы сақтау, тасымалдау және пайдалану тәртібін, сондай-ақ сертификатталмаған пиротехникалық өнімді сатқаны үшін тәртіп бұзушыларды тексереді.
Түркістан облысы ПД Әкімшілік полиция басқармасының бастығы Алмасхан Тастанбековтың айтуынша, “Пиротехника” жедел-профилактикалық іс-шарасын өткізу ең алдымен жаңа жылдық мерекелер кезінде қоғамдық тәртіп пен азаматтардың қауіпсіздігін қамтамасыз етуге, сондай-ақ балалар мен ересектер арасында жарақат алу жағдайларының алдын алуға бағытталған.
Сондықтан Түркістан облысының полицейлері азаматтарды пиротехниканы пайдалану кезінде қауіпсіздік ережелерін қатаң сақтауға, сондай-ақ жаңа жылдық өнімді тек оны өткізу үшін арнайы бөлінген сауда орындарынан сатып алуға шақырады.
