Жамбыл облысында ПД-ның ұйымдастыруымен «Әкем, анам және мен – спортшы жанұя» жарысы өтті, – деп хабарлайды Polisia.kz.
Жамбыл облысының полиция департаменті Халықаралық Отбасы күніне орай ҚАЖД және облыс әкімі жанындағы әйелдер істері және отбасылық-демографиялық саясат жөніндегі комиссиямен бірлесіп Динамо спорт кешенінде мемлекеттік басқарма өкілдері мен еріктілер арасында командалық жарыс ұйымдастырды.
Бұл іс-шараның басты мақсаты – отбасылық, адамгершілік құндылықтарды насихаттау, отбасы институтын нығайту және оның проблемаларына жұртшылықтың назарын аудару.
5 кезеңнен тұратын жарысқа 6 команда қатысып, түрлі кедергілерден өтiп, эстафеталық таяқшамен доптарды жүргізіп, өздерінің спорттық шеберліктері мен дағдыларын көрсетті.
Барлық қатысушылар өте белсенді ойын өрнегін танытты. Спорттық іс-шара жылы және достық атмосферада өттi. Қызықты сайыстың нәтижесінде Тараз қаласы полиция басқармасының «Сұңқар» командасы жеңіске жетті. Екінші орынды Жамбыл облысы әкімдігі денсаулық сақтау басқармасының «Қыран» командасы, үшінші орынды – «Lider.kz» еріктілер ұйымы иеленді.
Қатысушы командаларға дипломдар беріліп, жеңімпаздар кубоктарға ие болды. Сонымен қатар қатысушыларға футбол доптары, теннис ракеткалары және «Тоғыз құмалақ» үстел ойыны түріндегi естелік сыйлықтар табыс етілді.
