Жетісу облысында ардагерлер жас полицейлерді Халықаралық кітап күнімен құттықтады, — деп хабарлайды Polisia.kz.
Жетісу облысы полиция департаментінде Халықаралық кітап күніне арналған мерекелік іс-шара өтті. Шараға ішкі істер органдары мен Ұлттық ұланның ардагерлері қатысып, жас полицейлерді мерекемен құттықтап, кітаптың адам өміріндегі маңыздылығын атап өтті.
Ардагерлер өздерінің кәсіби және жеке өміріндегі кітаптың рөлі туралы айтып, есте қалған сәттерімен бөлісті. Олар мінез қалыптастыруға, ой-өрісті кеңейтуге және моральдық қағидаларды нығайтуға көмектескен әдебиеттерді ұсынды.
Бұл кездесу тек кітапқа деген құрмет қана емес, құқық қорғау органдары қызметкерлері буындарының арасындағы байланысты нығайтуға бағытталған маңызды шара болды. Жас қызметкерлер үлкендер кеңесін ықыласпен тыңдап, сұрақтар қойып, өздері оқыған шығармалар жөнінде пікір алмасты.
Ардагерлердің бірі: “Кітап — даналықтың көзі. Ол кәсіби өсуге ғана емес, ең күрделі жағдайда да адамгершілікті сақтауға көмектеседі”, — деп атап өтті.
Халықаралық кітап күні — тұлғаның дамуы мен кәсіби жетілуі ең алдымен оқуға деген сүйіспеншіліктен басталатынын еске салатын тамаша мүмкіндік. Мұндай кездесулер жас тәртіп сақшыларын рухани тәрбиелеуге және ұрпақтар сабақтастығын нығайтуға ықпал етеді.
