Жетісуда ауыл тұрғындарына мүгедектігі бойынша жәрдемақы рәсімдеп беруге уәде еткен алаяқ құрықталды, – деп хабарлайды Polisia.kz.
Панфилов ауданының полицейлері Жаркент қаласының 50 жастағы тұрғынын күдікті деп таныған бірқатар алаяқтықтарды тергеуді бастады.
Аудандық полицияға 10 адам арызданған. Олардың көбісі ауылдық жерлердің тұрғындары. Жәбірленушілер мүгедектігі бойынша мемлекеттік жәрдемақыны ресімдеуге жәрдемдесуге уәде берген бейтаныс әйелге қатысты шаралар қабылдауды талап етеді. Олардың әрқайсысы ресімдеу процесін тездету үшін күдіктіге 100-300 мың теңгеге дейін бергендігі белгілі болды.
– Жергілікті тұрғын анықталып, аудан бөліміне жауап алу үшін жеткізілді. Әйелдің дәрігер емес екендігі және оның осындай жәрдемақыларды тағайындауға жауапты МӘС-пен (медициналық-әлеуметтік сараптама) ешқандай байланысы жоқ екендігі анықталды. Бүгінгі таңда жәбірленушілерге келтірген залал шамамен 1,5 млн теңгені құрады, – деді Панфилов аудандық полиция бастығының орынбасары Ернар Қалтаев.
Тергеу ҚР ҚК-нің 190-бабы 3-бөлігі 4-тармағы (Бірнеше рет жасалған алаяқтық) бойынша жүргізіліп жатыр.
