Шымкент полицейлері жоғалған қызды тауып, туыстарына табыстады, – деп хабарлайды Polisia.kz.
Шымкент қаласы полиция департаментінің жедел басқару орталығына «102» арнасы арқылы жергілікті тұрғын перзентінің жоғалғаны туралы хабарлаған. Анасының айтуынша, қызы үйден кешкі сағат 20:45 шамасында белгісіз бағытқа шығып кетіп, үйіне қайта оралмаған.
Қаратау ауданы полиция басқармасының қызметкерлері хабарламаны алған бойда жедел-іздестіру жұмыстарына кірісті. Сұрастыру жұмыстары қолға алынып, жақын маңайдағы бейнебақылау камералары жіті қаралды. Полиция қызметкерлерінің жүргізген нәтижелі жұмыстарының арқасында он жеті жастағы қыз қала аумағынан аман-есен табылып, дін-аман ата-анасына табысталды.
Тәртіп сақшыларының жедел әрекетіне тәнті болған қыздың анасы алғыс айтып, ризашылығын білдірді.
