Астанада қоян-қолтық ұрыстан ерлер мен әйелдер арасындағы VII әлем чемпионаты аяқталды. Жарыс дуэль және өзін-өзі қорғау бойынша екі кезеңнен өтті. Ж.Үшкемпіров атындағы жекпе-жек сарайында үздіктер атағы үшін әлемнің 32 елінің спортшылары күш сынасты, оған 360-тан астам спортшы қатысты, – деп хабарлайды Polisia.kz.
Қазақстан құрама командасының спорттық намысын ішкі істер органдарының қызметкерлері де қорғады. Қоян-қолтық ұрыстан ерлер мен әйелдер арасындағы VII әлем чемпионатына полицияның 13 қызметкері қатысты. Жарыс қорытындысы бойынша полицейлер ел құрамасының қоржынына үш алтын, бес күміс және бес қола медаль салды.
Дуэль сайысында Маңғыстау облысы ПД оқу-жаттығу взводының инспекторы Ұлан Мұқашев пен Ақтөбе облысы ПД ЖҚАЖ аға инспекторы Айдын Төлепбаев екі алтын медаль жеңіп алды. Айта кетейік, халықаралық жарыс жүлдегерлері арасында полицей қыздар жақсы нәтиже көрсетті. Мәселен, екі күміс медальді Аманбек Жаманқараев, Қостанай облысы ПД ЖҚАЖ инспекторы және Астана қаласы ПД кіші жедел уәкілі Арай Мусина иеленді.
Саида Хасенова – Алматы қаласы ПД ЖҚАЖ инспекторы, Аида Хайруллина – Атырау облысы ПД ЖҚАЖ инспекторы, Амина Шайменова – елордалық полиция қызметкері және Қызылорда облысы ПД ЖҚАЖ жауынгері Гайни Нұрмахан ел қоржынына төрт қола медаль салды.
Сонымен қатар, өзін-өзі қорғау сайысында Атырау облысы полиция департаменті ЖҚАЖ инспекторы Аида Хайруллина қолынан босату техникасын, пышақ, таяқ пен тапаншаға қарсы ұрыста жақсы өнер көрсетіп, алтын алды.
Сондай-ақ Қазақстан құрама командасының қоржынына Сая Әуелбекова – Қостанай облысы ПД ЖҚАЖ аға инспекторы, Бақтияр Мұратбек – ІІМ бөлімшесінің инспекторы, Әлихан Сейтов – Атырау облысы ПД ЖҚАЖ инспекторы үш күміс медаль салды. Ал қола медальға Ақмола облысы полиция департаменті ЖҚАЖ аға инспекторы Мадимухамедов Ардақ ие болды.
ІІМ құрама командасын ІІМ Қарағанды академиясының дене шынықтыру даярлығы кафедрасының доценті, ҚР-ның қоян-қолтық ұрыстан еңбек сіңірген жаттықтырушысы, полиция полковнигі Болат Құлтаев дайындады.
