Ақтөбеде көліктен ұрлық жасаған күдіктілер анықталды, – деп хабарлайды Polisia.kz.
Қалалық полиция бөліміне Ақтөбе қаласының тұрғынынан хабарлама келіп түсті. Жәбірленушінің айтуынша, түнде көпқабатты үйлердің ауласында тұрған ВАЗ-2110 автокөлігінен құрал-саймандарды, аккумулятор мен тіркеуішті ұрлап әкетіп, 285 мың теңге шығын келтірген.
Жедел-іздестіру іс-шараларын өткізу барысында полицейлер бір тәулік ішінде күдіктілердің жеке басын анықтады. Олар 19 жастағы екі жас жігіт болып шықты. Күдіктілер Есет батыр тұрғындар алабында аулада тұрған автокөліктін есігін қысу арқылы ашып, заттарды ұрлап әкеткен.
Осы факті бойынша сотқа дейінгі тергеу жүргізіліп жатыр. Күдіктілер істеген қылмыстарын мойындады және олардың бұрын жасалған осындай басқа да қылмысқа қатысы бар-жоғы анықталып жатыр.
