Қолданбалы элементтер Петропавлда өткен «Полиция эстафетасы» бағдарламасына енді. Оған Солтүстік Қазақстан облыстық полициясы бөлімшелерінің, мамандандырылған күзет қызметі басқармасының, қылмыстық-атқару жүйесі департаментінің командалары қатысты. Әрқайсысы 8 қатысушыдан құралған 6 команда болды, – деп хабарлайды Polisia.kz.
Іс-шара құқықтық тәртіп сақшыларының кәсіби мерекесі қарсаңында өтті. Ұйымдастырушылар СҚО ПД арнайы және жұмылдыру дайындығы басқармасы және «Динамо» дене шынықтыру-спорт қоғамының облыстық филиалы болды. Қатысушыларды «Динамо» ДШСҚ СҚОФ төрағасының бірінші орынбасары Талғат Тұғынбаев пен ІІО ардагерлер кеңесінің төрағасы Ақан Сыздықов құттықтап, қазіргі полиция қызметкерлері — даңқты батырлардың ұрпақтары, олардың иығында құқықтық тәртіпті, азаматтардың мүдделері мен бостандықтарын қамтамасыз ету міндеті тұрғанын атап өтті.
Аймақтың құбылмалы климаты қиындық деңгейін біршама арттырды. Суық жаңбырдың астында полицейлер газ тұмылдырығымен жүгіруді, Макаров тапаншасын бөлшектеуді, оқ-дәрілерді алып жүруді, «жаралы адамдарды» тасымалдауды, Калашников автоматын құрастыру бойынша тапсырмаларды орындады. Соңғы сынақ 400 метр қашықтыққа жүгіру болды.
Үздік дайындықты СҚО ПД аппаратының командасы көрсетті. Мәре сызығына екінші болып МКҚБ қызметкерлері келді. Эстафетаның үшінші жүлдегері Петропавл қаласы ПБ командасы болды. СҚО ПД бастығының орынбасары Еңбек Сембин жүлдегерлерге медальдар мен кубоктарды табыс етті.
