Жамбыл облысында суатқа келген сиырды сойып алған күдікті анықталды, – деп хабарлайды Polisia.kz.
4 қарашада Талас ауданы полиция бөліміне Сарысу ауданының 54 жастағы тұрғыны арызданған. Ол Талас ауданына қарасты жайылымның бiрiнен бір сиыры жоғалғаны туралы шағым түсiрген.
Аталған дерекке қатысты ҚР ҚК-нің 188-1-бабы 1-бөлігімен сотқа дейінгі тергеп-тексеру ісі басталды. Аудандық полиция қызметкерлерімен жүргізілген жедел-іздестіру жұмыстарының нәтижесінде осы қылмысқа қатысы бар 67 жастағы Талас ауданының тұрғыны анықталды. Күдікті өз кінәсін толық мойындады. Ол жайылымда қараусыз жүрген малдар өзенге суға келгенде арасынан өзіне тиесілі сиырын таба алмағандықтан, бөтен iрi қара малды сол жерде ұстап, сойып алғанын айтты. Сондай-ақ етiн Алматы облысына сатуға берiп жiберген.
Қазіргі уақытта аталған дерек бойынша сотқа дейінгі тергеу амалдары жүргізіліп жатыр.
Жамбыл облысы полиция департаменті азаматтарға қырағы болып, төрт-түлігін қараусыз қалдырмауға кеңес береді. Мал иелері жайылымға малдарын қараусыз жібермей, бақташы жалдап, сондай-ақ үй малын таңбалауды және сырғалауды ұмытпау керектігін ескертеді. Жоғалған немесе ұрланған жағдайда, шұғыл «102» телефоны арқылы полицияға хабарлау керек.
