Шымкенттіктерге дауыс күшейткіштер арқылы интернет-алаяқтық туралы ескертілді, – деп хабарлайды Polisia.kz.
Мегаполис полицейлері киберқылмысқа қарсы бағытталған кезекті акцияны өткізуде. Шара барысында базарлар мен сауда орталықтарына келушілерге, қоғамдық көлік жолаушыларына қырағылық таныту қажеттігі, ешбір жағдайда және қандай да бір сылтаумен белгісіз адамдарға өзінің және банк карталарының дербес деректерін хабарламау қажеттігі туралы ескертілді. Сақтық шаралары жайлы мәтіндер дауыс күшейткіш құрылғылар арқылы хабарланды.
Сондай-ақ акция барысында тәртіп сақшылары қоғамдық орындарда алаяқтардың құрбаны болмау туралы ұсыныстар жазылған 1500-ден астам жадынама таратты.
Қала тұрғындарына интернет-алаяқтықтың кең таралған түрлері туралы айтылды: банк қызметкерлерінің атынан шабуылдаушылар ақшаны шотқа аударуға көндіреді немесе смартфонға жәбірленушінің ақшасын жымқыратын қосымша орнатуды ұсынады; ал, полиция қызметкерлерінің атынан оларға қылмыс жасаған жақын туысын жауапкершіліктен босату үшін белгілі бір соманы беруді сұрайды; сондай-ақ әлеуметтік желілерді бұзу арқылы олар сіздің атыңыздан таныстарыңызға шұғыл ақша аударуды өтініп хабарлама жібереді.
Құқық қорғау органдары күдікті нөмірлерден түскен қоңырауларға жауап бермеуді, қажет болған жағдайда банкке қайта қоңырау шалуды ұсынады.
Осы жағдайлардың кез-келгенінде сіз қырағы болуыңыз керек. Егер алданып қалған болсаңыз, дереу полицияға хабарласыңыз.
