ТМД бойынша үздік деп танылған Алматы облысының жас жол инспекторлары жол қозғалысы ережелері бойынша біліктіліктері мен білімдерін жетілдіруді жалғастырып жатыр, – деп хабарлайды Polisia.kz.
Өңірде учаскелік полиция қызметкерлерімен бірлесе отырып, жол-көлік оқиғалары мен балалардың жарақаттануының алдын алу мақсатында профилактикалық іс-шаралар жүргізіліп жатыр.
– Жол-көлік оқиғаларының алдын алу жұмыстары түрлі әдістермен жүргізіледі. Полицейлердің ең белсенді көмекшілерінің бірі – жас жол инспекторлары. Жол қозғалысына қатысты профилактикалық іс-шаралар кішкентай көмекшілерсіз өтпейді, өйткені олардың өздері балалар қауіпсіздігі туралы құрдастарына жеткізгендері дұрыс. Үш күн ішінде біз барлық мектепке дейінгі мекемеде жұмыс жүргіздік, – деп атап өтті ЖПҚБ ерекше тапсырмалар жөніндегі аға инспекторы Айжан Әлібайқызы.
Естеріңізге сала кетейік, Алматы облысының жас жол инспекторларының командасы 21-25 мамыр аралығында Беларусь Республикасында өткен 51-республикалық жарыста ТМД елдері арасында үздік деп танылды.
– Кезінде жол әліпбиінің қыр-сырын меңгерген ұлдар мен қыздар бүгінде 7-сынып оқушылары. Олар – қозғалыс ережелері мен алғашқы медициналық көмек көрсету ережелерін ғана емес, сонымен қатар жол қозғалысының сауатты және тәртіпті қатысушылары. Олар – жолда қауіпсіз жүріс-тұрыс дағдыларын қалыптастыруда баға жетпес көмек көрсететін сенімді жолдастарымыз, – деп толықтырды А. Әлібайқызы.
