Ұлытаудан қанат қаққан Асылмұрат Бірімжан – әскери қызмет пен спортты қатар алып жүрген, ел намысын қорғап жүрген нағыз ер азамат. Әскери қызметтегі тәжірибесі мен спорттағы жетістіктері арқылы ол туған жерінің мақтанышына айналды. Бүгінде Асылмұрат мас-рестлингтен халықаралық жарыстарда ел намысын қорғап, алдағы Әлем чемпионатына дайындық үстінде. Бұл туралы Polisia.kz редакциясы айтып береді.
Ұлытау топырағында туып, асқақ армандарын қанат қылған Асылмұрат Бірімжан – табандылық пен ерік-жігердің жарқын үлгісі. Петропавл қаласындағы Ұлттық Ұлан әскери институтының түлегі еңбек жолын Ақтау қаласындағы 6655 әскери бөлімінде взвод командирі болып бастаған еді.
Өз өлкесі облыс орталығы мәртебесіне ие болғаннан кейін, туған жерге қызмет етуге бел буған жас офицер 2022 жылдың наурызында әскери қызметтен полицияға ауысып, Сәтбаев қаласындағы полиция бөлімінің жылдам қимылдайтын арнайы жасағына сарбаз болып қосылды. Бүгінде ол сол бөлімде аға инспектор лауазымында қызмет атқарады.
Асылмұраттың спортқа, әсіресе жеңіл атлетикаға деген құштарлығы оның өмірлік жолында әрдайым қолдау болды. Ол жеңіл атлетикадан спорт шеберлігіне үміткер атанып, мас-рестлингтен спорт шебері дәрежесін иеленген.
Мас-рестлинг, халық арасында «таяқ тартыс» деп танылған ұлттық ойын, Қазақстанда тек 2013 жылы таныла бастады. Алғашқы спорт секциялары осы жылы ашылып, сол уақыттан бері бұл түркі тілдес халықтардың ортақ мұрасы ретінде үлкен танымалдыққа ие болды. Ресей Федерациясында 2003 жылы ресми спорт түрі ретінде мойындалған мас-рестлинг бүгінде халықаралық деңгейде қарқынды дамып келеді. Бұл спорт түрі Дүниежүзілік көшпенділер ойындарының бағдарламасына да енген.
Асылмұрат Нұрболатұлы мас-рестлингпен кәсіби түрде шұғылданып, соңғы екі жылда өз шеберлігін шыңдады. 2024 жылдың қыркүйегінде Астана қаласында өткен 5-ші Дүниежүзілік көшпенділер ойындарында ол қола жүлдеге ие болды. Байрақты бәсекеде 89 мемлекеттің мықты спортшылары бақ сынасты. Асылмұрат Иран, Моңғолия, Қырғызстан және Өзбекстан елдерінің балуандарымен белдесіп, шеберлігін дәлелдеді.
Бұдан бөлек, ол 2023 жылы Ұлытау облысының чемпионатында жүлдегер атанып, 2024 жылы Астана қаласында өткен республикалық турнирде бас жүлдені жеңіп алды. Сондай-ақ Өзбекстанда өткен Азия чемпионатында қола жүлде иеленіп, Қазақстанның абыройын асқақтатты.
Қазіргі таңда Асылмұрат қараша айының 30-ында Қырғызстанның Бішкек қаласында өтетін Әлем чемпионатына қызу дайындық үстінде. Ұлытаудың ұланы туған жерінің атын шығарып, еліміздің көк байрағын биікте желбіретуді мақсат етеді.
