Абай облысының полиция қызметкерлері “Қыс – 2024” республикалық оқу-жаттығуына қатысып, қатаң қысқы төтенше жағдайларда жедел әрекет ету шараларын пысықтады, – деп хабарлайды Polisia.kz.
Көкпекті ауданында өткен оқу-жаттығу өткен жылғы оқиғаларды ескере отырып ұйымдастырылды. Сол кезде қатты боран Омбы – Майқапшағай тасжолының Байбұра учаскесінде жүздеген жүргізушіні қар құрсауында қалдырған еді.
Оқу-жаттығу барысында полиция қызметкерлері құтқарушылармен және жергілікті атқарушы органдармен бірлесіп, негізгі сценарийлерді пысықтады: халықты жедел хабардар ету, қауіпті учаскелерді жабу, азаматтарды эвакуациялау және қоғамдық тәртіпті қамтамасыз ету. Барлық қызметтердің үйлесімді әрекетіне ерекше назар аударылды.
Бұл оқу-жаттығу тек дайындық деңгейін тексерумен шектелмей, осындай төтенше жағдайлардың алдын алуға және тұрғындардың қауіпсіздігін тіпті ең күрделі қысқы жағдайда қамтамасыз етуге бағытталған маңызды қадам болды.
