Шымкентте көлік тізгіндеген қыз полицейлерге алғысын жеткізді, – деп хабарлайды Polisia.kz.
Шымкент қаласының тұрғыны жол үстінде қиын жағдайға тап болып, полицейлердің көмегіне жүгінді. Оның айтуынша, көлігінің дөңгелегі жарылып, не істерін білмей, көмек іздеуге мәжбүр болған.
– Ұзақ уақыт бойы өтіп жатқан көліктерді тоқтатып, жәрдем сұрадым, бірақ ешкім тоқтамады. Үсіп қалдым деуге болады, – деп бөлісті ол.
Жол жиегінде тұрған көлікті байқап қалған патрульдік полиция қызметкерлері бірден тоқтап, жағдайды анықтауға кіріскен. Олар тез арада дөңгелекті ауыстырып, жүргізушінің сапарын жалғастыруына мүмкіндік берді.
– Көмекке тек полицейлер келді. Үлкен алғысымды білдіремін! Сіздер жарадыңыздар! – деп автоледи шын жүректен ризашылығын жеткізді.
Өз кезегінде тәртіп сақшылары қиын жағдайға тап болған азаматтарға көмектесу – кезекшілік міндетіндегі әр экипажға берілетін нұсқаулықтың бір бөлігі екенін және бұл олардың күнделікті жұмысы екенін атап өтті.
