Қызылорда облысы бойынша ҚАЖД-да сотталғандарды жұмыспен қамту мәселесі талқыланды, - деп хабарлайды Polisia.kz.
Қызылорда облысы бойынша Қылмыстық-атқару жүйесі департаментінің №37 мекемесінде сотталғандарды еңбекпен қамту мәселесі талқыланған мазмұнды кездесу өтті. Іс-шараға мекеме бастығының орынбасары Бижігіт Оспанбеков төрағалық етті. Сондай-ақ жиынға Еңбек қатынастарын бақылау бөлімінің басшысы, мемлекеттік еңбек инспекторы Досымов Болат Бекайдарұлы, ҚАЖД сотталғандардың еңбегін ұйымдастыру тобының бас маманы, әділет подполковнигі Бахыт Абилова және аймақтағы бірқатар жеке кәсіпкерлер қатысты.
Кездесу барысында мамандар сотталғандарды еңбекке тартудағы заң талаптарын кеңінен түсіндірді. Олар еңбек шартын жасау және рәсімдеудің маңыздылығына, жалақы төлеу міндеттеріне, сондай-ақ еңбек кодексіне сәйкес сотталғандарға еңбек демалысын беру мәселелеріне ерекше тоқталды. Мамандар кәсіпкерлерді еңбек кодексінің талаптарын қатаң сақтауға шақырды.
Кездесу соңында жеке кәсіпкерлер өздерін толғандырған сұрақтарын қойып, толық әрі нақты жауаптар алды. Сұрақтар негізінен сотталғандарды жұмысқа тартудағы құқықтық ерекшеліктер, еңбек шарттарын рәсімдеу талаптары және өндірістік процестерді ұйымдастыру мәселелерін қамтыды.
— Сотталғандарды жұмыспен қамту – олардың қоғамға қайта бейімделуінің ең маңызды қадамдарының бірі. Мұндай кездесулер жұмыс берушілер мен мемлекеттік органдар арасындағы өзара ынтымақтастықты арттыруға, сондай-ақ сотталғандардың еңбек құқықтарын қорғауға және оларды қоғам өміріне араластыруға септігін тигізеді. Жазасын өтеушілерді жұмыспен қамту арқылы мемлекет және жеке тұлғалар алдындағы қарыздарын өтеуге мүмкіндік жасалады. Қазіргі таңда біздің мекемеде жазасын өтеушілердің 100%-ы жұмыспен қамтылған, – деп атап өтті сотталғандардың еңбегін ұйымдастыру тобының аға инспекторы Сая Кенжеғұлова.
Мұндай бастамалар сотталғандардың еңбекке араласуымен қатар, олардың түзелу жолына түсуіне ықпал етіп, болашақта қоғамға оралуына үлкен мүмкіндік береді.
