Өскемен қаласында ерекше балаларға арналған ерекше сыйлық жасалды, – деп хабарлайды Polisia.kz.
Бұл бастамаға сотталғандар, әлеуметтік кәсіпкер және валеологиялық орталықтың өкілдері атсалысып, бірлескен жұмыстың нәтижесінде «Valeo» интеллектуалды-дамытушы кешенін дайындады.
Мектеп жасына дейінгі және бастауыш мектеп жасындағы балаларға арналған бұл кешен дарынды балаларға арналған валеологиялық мамандандырылған мектептің авторлық ұжымы әзірлеген инновациялық әдістеме негізінде жасалған.Жобаның жүзеге асырылуы биылғы жылдың басында басталды. Валеологиялық мектеп өкілдері әлеуметтік кәсіпкер Алексей Кирюховқа ағаштан жасалған ойын кешенін дайындауға көмек сұрап жүгінген. Алексей Владимирович соңғы төрт жыл бойы ШҚО бойынша қылмыстық-атқару жүйесі мекемелерінде сотталғандармен жұмыс істеп келеді.
— Бұл ерекше кешенді дайындау өте мұқият әрі күрделі жұмыс. Ол 2400-ден астам түрлі геометриялық фигурадан тұрады. Барлық бөлшектер алты науасы бар арнайы мобильді тумбаға жинақталған. Әрбір бөлшек мұқият өңделіп, тегістелген, балалардың қауіпсіздігі толығымен қамтамасыз етілген. Жиынтықты пайдалану ыңғайлы болу үшін оны топтан топқа жылжытуға арналған арнайы роликтер қарастырылған. Мұндай кешенді дайындау үшін 15 сотталған екі-үш апта бойы жұмыс істеді, — дейді Алексей Кирюхов.
Бұл жоба Қазақстанда алғаш рет жүзеге асырылды. ШҚО ҚАЖ департаментінің, прокуратура және Кәсіпкерлер палатасының қолдауымен әзірлеушілер жыл соңына дейін «Ғажайыптар елі» арнайы мектеп-балабақшасына тағы бір осындай сыйлық жасауды жоспарлап отыр.
— «Valeo» интеллектуалды-дамытушы кешені балалардың шығармашылық қабілеттерін, логикалық ойлауын, ұсақ моторикасын және қиялын дамытуға мүмкіндік береді. Сонымен қатар, кез келген конструкцияларды құрастыруға жағдай жасайды, — дейді Наталья Васильевна, кешенді әзірлеушілердің бірі.
Реабилитация орталығының «Ғажайыптар елі» директоры Лилия Мамбурова да бұл сыйлықтың маңыздылығын ерекше атап өтті.
— Біздің орталық ерекше балалармен жұмыс істейді, сондықтан мұндай дамытушы кешендер бізге ауадай қажет. Бұл сыйлықтың сүйіспеншілікпен жасалғаны анық көрініп тұр. Сотталғандар ерекше балалар үшін осындай сыйлықтың қаншалықты маңызды екенін түсінетініне ризамыз, – деді ол.
Айта кетейік, «Ғажайыптар елі» — Қазақстандағы эмоционалды-еріктік саладағы бұзылыстары мен аутизмге шалдыққан балаларға арналған алғашқы түзету балабақшасы. Мұндай жобалар ерекше балалардың дамуына, оқу үрдісін қызықты әрі тиімді етуге үлкен үлес қосады.
