Қарағанды және Ұлытау облыстары бойынша ҚАЖД-ға қарасты № 36 мекемеде әйелдерге арналған "Өзіне өзі визажист" шеберлік сабағы өтті, - деп хабарлайды Polisia.kz.
Қарағанды облысы мен Ұлытау облысы бойынша ҚАЖД-ға қарасты № 36 мекемесінде 8 наурыз – Халықаралық әйелдер күніне орай ерекше іс-шара ұйымдастырылды. Мекеме қызметкерлері сотталған әйелдерге арналған "Өзіне өзі визажист" тақырыбында шеберлік сабағын өткізді. Бұл іс-шараның басты мақсаты – әйелдерге сұлулықтың маңыздылығын еске салып, өздерін әдемі әрі сенімді сезінуге мүмкіндік беру, сондай-ақ әйелдік болмыс пен жан сұлулығын арттыру болды.
Шеберлік сыныбы барысында қатысушылар сұлулық саласының негізгі аспектілері бойынша кешенді білім алып, кәсіпқой визажистердің құпияларымен танысты. Олар өздерінің сыртқы келбетінің ерекшеліктерін ескере отырып, макияж жасау дағдыларын үйренді. Бұл тәжірибе әрбір әйелге өзін-өзі бағалауды және өзін әдемі сезінуді үйретіп қана қоймай, күнделікті өмірде қолдануға болатын жаңа дағдыларды меңгеруге мүмкіндік берді.
- Мұндай іс-шаралар, әсіресе, оқшаулану жағдайында ерекше мәнге ие. Қазіргі уақытта адамдардың психикалық жағдайы маңызды рөл атқарады. Релаксация мен өзін-өзі тану тәжірибелері стресс деңгейін төмендетіп, жалпы әл-ауқатты жақсартуға ықпал етеді. Макияж – бұл өзін-өзі көрсету мен шығармашылықты білдірудің бірегей тәсілі. Әрбір макияж бен әр қылқалам әйелдің ішкі әлемі мен сыртқы келбеті арасындағы алтын көпір болып табылады. Мұндай шеберлік сыныптары сотталған әйелдерге тек сыртқы сұлулықтарын ғана емес, сонымен бірге ішкі дүниелерін дамытуға да көмектеседі, – деп атап өтті аға инспектор-психолог Дана Аширбекова.
Шеберлік сыныбы, тек эстетикалық көрініс қалыптастыру ғана емес, сондай-ақ өзін-өзі тану мен жеке қасиеттерді дамыту мүмкіндігіне айналды. Бұл іс-шара сотталған әйелдердің эмоционалдық жай-күйін жақсартуға ықпал етіп, олардың психологиялық әл-ауқатын көтерді. Әрбір қатысушы өзін ерекше сезініп, сұлулық әлемінде жаңа мүмкіндіктерге қадам басқандай болды.
