Наурыз мейрамы қарсаңында ШҚО полиция департаментінің есірткі қылмысына қарсы іс-қимыл басқармасы Қазақстан-Американдық еркін университетінің көпсалалы колледжінің студенттері мен оқытушыларына арналған ерекше іс-шара ұйымдастырды, – деп хабарлайды Polisia.kz.
Бұл шараның мақсаты - ұлттық дәстүрді, спортты және салауатты өмір салтын насихаттау сынды қасиеттерді біріктіру.
Киіз үй – қазақ мәдениетінің символы. Шара барысында мықты батыр, теңге лақтыру, арқан тарту және қол күрес сияқты қызықты жарыстар өтті. Жастар ойынға белсенді қатысып, көрермендер қызу қолдау білдіріп, нағыз мерекелік атмосфера орнады.
Мерекелік концерттің басты қызықты сәті "Мен қазақтың батырымын" байқауы болды. Қатысушылар қошқарды көтеріп, өздерінің күш-жігері мен төзімділігін көрсетті. Жарыстың жеңімпазы – қошқарды 150 рет көтерген 2-курс студенті атанды.
Барлық қатысушыға естелік сыйлықтар табысталып, көрермендерге есірткіге қарсы ұрандары бар футболкалар, кепкалар, маскалар мен қаламдар таратылды.
Бұл іс-шара жас ұрпаққа салауатты өмір салты, спорт пен ұлттық дәстүрлердің маңыздылығын еске салған қызықты мереке болды!