Алматы қалалық ПД киберқылмыспен күрес басқармасы Алматы қаласындағы "Тұран" университетімен және ҚР ІІМ академиясымен бірлесіп, азаматтарды алаяқтық тізбектерге тартудың өзекті мәселесіне арналған "Drop" әлеуметтік фильмінің тұсаукесерін өткізді, – деп хабарлайды Polisia.kz.
Режиссер Диас Әзімжанов Turan Film базасында түсірген фильмде дропперлер – банк шоттары арқылы басқалардан ұрланған ақшаны қолма-қол ақшаға айналдыратын адамдар туралы баяндалады. Көбінесе, дропперлер қылмысқа сыбайлас болып жатқанын түсінбейді.
Қаржылық алаяқтықтың ең көп таралған түрлерінің бірі – дроппер қызметін ұсыну. Заңға қайшы әрекеттерге ұрынбау үшін келесі ережелерді есте сақтаңыз:
1.Банк карталарыңызды, құпия сөздеріңізді, шоттарыңызды немесе ЖСН-ді ешкімге, тіпті таныстарыңызға да бермеңіз.
2.Біреудің атына шот ашуға немесе карта рәсімдеуге келісу – қылмысқа апарар алғашқы қадам.
3.Интернетте сізге бөгде адамның ақшасын "тез әрі оңай" шешіп беру ұсынылса – бұл алаяқтық болуы мүмкін. Сақ болыңыз!
