Талдықорғанда жеке құрам мен әскери қызметшілерге арналған оқу-жаттығу сабақтары өтті, - деп хабарлайды Polisia.kz.
Жетісу облыстық полиция департаменті басшылығының нұсқауына сәйкес, Талдықорған қаласында ведомстволық өзара іс-қимылды күшейту мақсатында жеке құрам мен әскери қызметшілерге арналған оқу-жаттығу сабақтары өтті.
Іс-шараға Ұлттық ұлан бөлімшелерімен қатар теолог, есірткі қылмыстарына қарсы іс-қимыл басқармасының, экстремизмге қарсы іс-қимыл басқармасының, ақпараттық саясат бөлімінің қызметкерлері мен арнайы жылдам әрекет ету жасағының (СОБР) сарбаздары қатысты.
Оқу бірнеше өзекті бағытты қамтыды. Жауынгерлік және арнайы дайындық сабақтарында қатысушыларға төтенше жағдайлар мен қызметтік міндеттерді орындау кезінде қажет негізгі дағдылар еске салынды. Дінтанушы маман діни ағымдарды ажырата білу және деструктивті ықпалдың белгілерін дер кезінде тану жолдарын түсіндірді. Ал есірткі қылмысына қарсы іс-қимыл басқармасының қызметкерлері нашақорлықтың қаупі мен оған қарсы күрес әдістері туралы профилактикалық әңгіме жүргізді.
Бөлек бір бөлім қоғамдық имидж және коммуникация мәселелеріне арналды. Жетісу облысы полиция департаментінің баспасөз қызметінің өкілдері мемлекеттік қызметкерлер мен мерзімді қызметке шақырылған сарбаздардың имиджі қалай қалыптасатынын, бұқаралық ақпарат құралдары мен азаматтық тұрғындармен қарым-қатынас кезінде өзін қалай дұрыс ұстау керектігін, сондай-ақ сынға немесе арандатушылыққа қалай сауатты жауап беру керектігін түсіндірді.
Іс-шара ашық диалог форматында өтті – қатысушылар белсенді түрде сұрақтар қойып, күнделікті қызмет барысында кездесетін кәсіби және тұлғалық қиындықтарды талқылады. Барлық сұрақтар жан-жақты қарастырылып, спикерлер толық жауап беріп, тәжірибелерімен және практикалық кеңестерімен бөлісті.
Мұндай оқу кездесулері кәсіби өсуге ғана емес, сонымен қатар командалық рухты нығайтуға ықпал етіп, күштік құрылымдардың кез келген жағдайда тиімді әрекеттесуіне дайындық деңгейін арттырады.
