Павлодар облысында "Қауіпсіз жайылым" акциясы өтуде, - деп хабарлайды Polisia.kz.
Иесіз мал — тек қолайсыздық қана емес, жол-көлік оқиғасына тікелей қауіп төндіретін фактор. Осы қауіптің алдын алу мақсатында Павлодар облысында "Қауіпсіз жайылым" профилактикалық іс-шарасы басталды.
Акция аясында полиция қызметкерлері әкімдіктермен, ветеринариялық қызметтермен және ауылдық округтердің өкілдерімен бірлесіп рейдтер өткізуде. Тұрғындармен кездесулер ұйымдастырылып, бақылаусыз жайылым орындарына шығып, мал иелеріне заң талаптары түсіндіріледі және жадынамалар таратылады.
— Мал жаю ережелерін сақтамау көбіне жол-көлік оқиғаларына, адамдардың өмірі мен мүлкіне қауіп төндіруге, жердің бүлінуіне және жанжалдарға әкеледі. Іс-шараның мақсаты — осындай жағдайлардың алдын алу, олардың санын азайту және мал иелеріне жауапкершілікті түсіндіру, — дейді Павлодар облысы полиция департаменті.
Иесіз малдың басты себебі — меншік иелерінің бақылауының болмауы. Үй жануарларын жайылымға жіберген иелер көбінесе олардың өз бетінше үйге оралуына сенеді де, қараусыз қалдырады. Ал республикалық, облыстық және жергілікті маңызы бар жолдар бойында қараусыз жайылып жүрген мал жиі жол-көлік оқиғаларына себеп болады.
Мәселен, Екібастұз өңірінде жүргізілген рейд барысында полицейлер қараусыз жайылып жүрген жылқылар табынын анықтады. Мал иесі жауапкершілікке тартылып, жылқылар арнайы мал тұраққа жеткізілді.
Баянауыл ауданы жолдарында тәртіп сақшылары жүргізушілерге түнгі уақытта жолда қырағы болу қажеттігін ескертіп, ауыл шаруашылығы жануарлары шығуы мүмкін қауіпті учаскелерді көрсетті.
— Ауылдық жерде мал — жиі жалғыз табыс көзі. Күзгі-қысқы кезеңде мал ұрлығы көбейеді. Сондықтан полиция мал иелерін жайылымды дұрыс ұйымдастыруға, малдың сақталуын қамтамасыз ету үшін жеке шаралар қабылдауға шақырады: малды таңбалау, қора мен ұстайтын орындарды нығайту, жарықтандыру мен бейнебақылау орнату, жол маңына жібермеу. Сондай-ақ барлық мал басын ауылдық әкімдіктерде есепке қою, таңбалау, чиптеу жүргізу қажет, — деп атап өтті ведомство өкілдері.
Айта кетейік, биыл бақылаусыз жайылымға жібергені үшін шамамен 1 мың мал иесі жауапқа тартылған. Арнайы тұрақтарға 14 мыңнан астам иесіз мал қамалды.
