Атырауда Конституция күні қарсаңында полицейлер арасында зияткерлік сайыс өтті, - деп хабарлайды Polisia.kz.
Қазақстан Республикасы Конституциясының 30 жылдығына орай Ғ. Сланов атындағы облыстық ғылыми-әмбебап кітапханада Атырау облысы полиция департаментінің қызметкерлері арасында зияткерлік сайыс ұйымдастырылды.
Сайыстың негізгі мақсаты – полицейлердің құқықтық және жалпы білім деңгейін арттыру, аналитикалық ойлау қабілетін дамыту, сондай-ақ ұжымдағы ұйымшылдықты нығайту болды. Қатысушыларға Конституция мен Қазақстан тарихына қатысты сұрақтар қойылып, логикалық тапсырмалар ұсынылды.
Бәсеке жоғары белсенділік пен шығармашылық атмосферада өтіп, әрбір қызметкер өз білімін ғана емес, командада жұмыс істей білу қабілетін де көрсетті.
Атырау облысы полиция департаментінің жеке құраммен жұмыс бөлімінің бастығы Ғалымжан Сембаев шараның маңыздылығына тоқталды:
– Конституция – мемлекетіміздің негізі әрі әрбір азаматтың құқықтары мен бостандықтарының кепілі. Бүгінгі сайыс полиция қызметкерлерінің тек құқық қорғау саласының өкілдері ғана емес, терең білімге ие, үнемі дамуға ұмтылатын тұлғалар екенін дәлелдеді. Мұндай бастамалар құқықтық сананы күшейтіп, жеке құрамның кәсіби дайындығын арттыра түседі, – деді ол.
Жарыс қорытындысында үздік шыққан командалар грамоталармен және естелік сыйлықтармен марапатталды. Ұйымдастырушылардың айтуынша, мұндай зияткерлік шаралар дәстүрге айналып, полиция қызметкерлерінің кәсіби мақтаныш сезімін қалыптастыруға және ұжымдық бірлікті нығайтуға ықпал етпек.
