Павлодарда полицейлер алаяқтардың құрбаны болмаудың жолдарын түсіндірді, - деп хабарлайды Polisia.kz.
Павлодар облысында қашықтан жасалатын алаяқтықтың алдын алу мақсатында аймақтық коммуникациялар қызметінің алаңында брифинг өтті.
– Елімізде цифрландыру қаншалықты дамыса, киберқылмыс та соғұрлым артып келеді. Әр күні жаңа алдау тәсілдері пайда болып, азаматтардың қомақты қаржылық шығынға ұшырауына себеп болуда. Мәселен, егер 2024 жылы облыс тұрғындары алаяқтарға 2 миллиард теңгеден астам қаражат жоғалтса, биыл бұл көрсеткіш 3 миллиард теңгеден асып отыр, – деді Павлодар облысы ПД киберқылмысқа қарсы іс-қимыл басқармасының бастығы Асхат Әбетжанов.
Спикердің айтуынша, алаяқтардың негізгі мақсаты – азаматтардың қаражатын немесе жеке деректерін қорқыту не алдау арқылы иемдену.
Ол сондай-ақ 2025 жылғы 16 қыркүйектен бастап Қазақстанда "дропперлікке" қатысты жаңа қылмыстық жауапкершілік күшіне енетінін атап өтті. Дропперлер – киберқылмыскерлерге заңсыз жолмен алынған ақшаны аударуға жәрдемдесетін адамдар. Бұл қылмыс үшін ең жоғары жаза – мүлкін тәркілеумен қатар жеті жылға дейін бас бостандығынан айыру.
Кездесу барысында полицейлер тұрғындарға алаяқтардың құрбаны болмаудың негізгі жолдарын да түсіндірді:
1414-тен келген SMS-кодты бөгде адамға айтып қойсаңыз, абыржымаңыз. Бір ғана кодпен несие рәсімдеу мүмкін емес. Бұл – фишинг деп аталады;
Ақшаны күмәнді есепшоттарға аудармаңыз;
Пәтеріңізді ешкімнің қысымымен сатпаңыз;
Жинағыңызды жалған инвестициялық жобаларға салмаңыз – ол қаражат қайтарылмайды;
Тауарды алдын ала төлем жасамай тұрып мұқият тексеріңіз;
Күмәнді сілтемелерге өтпеңіз, өйткені қаскөйлер сол арқылы шоттағы барлық қаржыңызды шешіп алуы мүмкін;
"Жеңіл табыс" үшін банктік картаңызды ешкімге бермеңіз.
– Кез келген күмән туындаса, дереу құқық қорғау органдарына хабарласу қажет. Алаяқтардан қорғанудың ең сенімді жолы – бейтаныс нөмірлермен сөйлеспеу және кез келген шешім қабылдар алдында ақпаратты мұқият тексеру, – деп қорытындылады Асхат Әбетжанов.
