Абай облысында полицейлер ардагерлерді ардақтады, - деп хабарлайды Polisia.kz.
Қарттар күні – күнтізбедегі бір дата ғана емес, ұлт пен қоғам үшін еңбегі сіңген, өмірін Отанға қызмет етуге арнаған ардагерлерге деген риясыз құрмет пен алғыстың мерекесі. Абай облысы полиция департаментінде бұл игі дәстүр жыл сайын ерекше ықыласпен аталып өтеді.
Мереке қарсаңында тәртіп сақшылары ардагерлерін арнайы құттықтап, ізгі тілектерін жеткізді. Салтанатты жиын барысында уақыт бір сәтке тоқтап, өткен жылдардың ерлікке толы парақтары қайта жаңғырғандай әсер сыйлады. Халқына адал қызмет етіп, өскелең ұрпаққа тәлім-тәрбие берген қариялар – ұжымның рухани тірегі, заң мен әділеттің мәңгілік шамшырағы іспетті.
Бүгінде Абай облысында ішкі істер органдарынан зейнеткерлікке шыққан 3897 ардагер тұрады. Бұл – ел тыныштығы мен қоғам қауіпсіздігін сақтау жолындағы адалдық пен жанқиярлықтың ұрпақтан ұрпаққа жалғасқан айқын айғағы. Олар – тәжірибе мен парасаттың сарқылмас қазынасы.
Солардың ішінде Семей облыстық ІІБ штабы бастығының орынбасары қызметін абыроймен атқарған Владимир Фоминых пен Семей қаласы Киров аудандық ІІБ қылмыстық іздестіру бөлімінің үздік маманы Вячеслав Шестаков есімдері айрықша аталды. Бұл ардагерлердің қызмет жолы – адалдықтың, ерліктің, кәсіби шеберліктің жарқын үлгісі. Олардың өнегесі – бүгінгі жас қызметкерлер үшін бағыт-бағдар, болашаққа апарар жолды нұрландыратын мәңгілік шамшырақ.
Департамент басшылығы ардагерлерге шынайы ризашылық білдіріп, олардың құқықтық тәртіпті нығайту мен қоғамдық қауіпсіздікті қамтамасыз етудегі баға жетпес үлесін атап өтті. Сый-сияпаттар мен құрмет көрсету – жай ғана дәстүр емес, өткенге деген тағзым мен келер күнге деген сенімнің айқын белгісі. Осылайша, ардагерлер аманаты мен бүгінгі жетістіктер алтын арқау болып, ұрпақтар сабақтастығын жалғастырып келеді.
