Қостанайда мотокроссшылардың қатысуымен "Есірткіге жол жоқ" акциясы өтті, - деп хабарлайды Polisia.kz.
Қостанай қаласында "Заң мен тәртіп" қағидаты аясында "Есірткіге жол жоқ" ұранымен акция өтті.
Іс-шараны Қостанай облысы полиция департаментінің есірткі қылмысына қарсы іс-қимыл басқармасы Қостанай облысы әкімдігінің дене шынықтыру және спорт басқармасының қолдауымен ұйымдастырды.
Акцияның басты мақсаты – жастардың назарын салауатты өмір салтына аудару және нағыз адреналин мен қуатты тек спорт пен белсенді өмірден алуға болатынын көрсету.
Іс-шара барысында қостанайлық мотокроссшылар өз шеберліктерін, ерік-жігерін және кәсіби дайындықтарын көрсетіп, көрермендерге керемет шоу сыйлады. Жастар есірткінің зияны мен оны болдырмау жолдары туралы әңгімелерге белсене қатысты.
— Бүгін біз спорттың кез келген тәуелділіктің ең үздік баламасы екенін көрсеткіміз келеді. Саналы таңдау, алға ұмтылу және өз денсаулығына қамқорлық – адамды нағыз еркін етеді, — деп атап өтті ұйымдастырушылар.
Акцияға қатысушылар спортшыларға және бастаманы қолдаған барлық азаматтарға алғыстарын білдіріп, жастар арасында есірткіге қарсы тұрақты көзқарас қалыптастыру мен салауатты өмір салтын насихаттаудың маңыздылығын атап өтті.
Іс-шара достық атмосферада аяқталып, қатысушылар естелік суретке түсіп, осындай пайдалы және қызықты акциялар жиі өткізілсін деген тілектерін білдірді.
