Бүгінгі қоғам — түрлі сынақтар мен қауіп-қатерлерге толы заман. Ақпарат тасқыны мен өмірдің жылдам ағымында адам баласы үшін ең қымбат дүние – денсаулықты сақтау, рухтың беріктігі мен ойдың тазалығын қорғау. Осы орайда танымал спортшы, актер және каскадер Еркебұлан Тоқтар ел азаматтарын салауатты өмір салтын ұстануға, өз болашағына жауапкершілікпен қарауға үндейді. Толығырақ Polisia.kz сайтынан оқыңыздар.
Еркебұланның өмір жолы – табандылық пен еңбектің, ерік-жігер мен сенімнің үлгісі. Көп жылдар бойы ол спорт арқылы тәртіп пен өзін-өзі дамытудың өмірді түбегейлі өзгерте алатынын дәлелдеп келеді. Оның айтуынша, шынайы күш бұлшық етте емес, адам мінезі мен рухында.
- Шынайы жауынгер – қарсыласын ғана емес, өз-өзіңді жеңе білетін адам, – дейді Еркебұлан.
Ол бұл қағиданы тек сөз жүзінде емес, іс жүзінде дәлелдеп жүрген жан. Спортшы үшін күрес – тек татамиде немесе аренадан тыс жерде емес, күн сайынғы өзін-өзі жетілдіру мен ішкі тәртіпті сақтау жолында жалғасатын өмірлік мектеп.
Еркебұланның көзқарасы "Заң мен тәртіп" концепциясының мәнімен үндес. Бұл бастама қоғамдағы тыныштықты, адамгершілік құндылықтарды және рухани тұрақтылықты нығайтуға бағытталған. Полиция қызметкерлері, жастар мен белсенді азаматтар осы идея төңірегінде бірігіп, нашақорлық пен теріс әдеттерге қарсы ортақ күрес жүргізуде.
- Нашақорлыққа қарсы күрес – тек полицияның емес, әр адамның борышы. Әрқайсымыз өзімізден бастасақ, қоғам да өзгереді, – дейді спортшы.
Ол жастарды спортты серік етуге, шығармашылықпен айналысуға және әр күнін игі істермен өткізуге шақырады. Себебі әрбір қимыл, әрбір жақсылыққа ұмтылу – өз болашағына және елдің дамуына қосылған үлес.
Еркебұланның өмірлік ұстанымы қарапайым, бірақ терең мәнге ие:
- Өмір – үлкен арена. Онда жеңіске жететін – рухы таза, жаны мықты адам, - дейді ол.
Оның айтуынша, салауатты өмір салты – адамның өзіне деген құрметі мен ерік-жігерінің айғағы. Бұл тек спортпен шұғылдану емес, өз-өзіңді тәрбиелеу, рухани және моральдық тазалыққа ұмтылу жолы.
Еркебұлан Тоқтар – салауатты өмір салтын ұстанудың үлгісін көрсетіп жүрген тұлға. Ол әр адамның өз таңдауын саналы түрде жасап, жақсылық пен спортты, денсаулық пен рухани тазалықты өмірінің басты құндылығына айналдыруына шақырады.
Оның сенімі нық: егер әр азамат денсаулығын нығайтып, рухын шыңдауға талпынса, Қазақстан мықты, саналы және жарқын болашаққа бет алатын елге айналады.
