Жетісу облысында кинологтардың тәжірибелік-тактикалық оқу-жаттығулары өтті, – деп хабарлайды Polisia.kz.
Кинологиялық орталық мамандары есірткі мен жарылғыш заттарды іздеу, сондай-ақ штурмдық ұстау — кинологиялық дайындықтың ең күрделі бағыттарының бірі — бойынша дағдыларын пысықтады. Шектеулі кеңістік, шартты қаруланған қылмыскер және кинолог пен иттің дәл жұмысы. Мұнда секундтар шешуші рөл атқарады — топ тапсырманы сенімді орындады.
Оқу-жаттығуларға Талдықорған агротехникалық колледжінің кинология факультеті студенттері де қосылды. Көбі үшін бұл алғашқы шынайы сын болды. Олар кәсіби мамандармен қатар жұмыс істеп, иттерді күйзелісті жағдайда басқарды және қызмет жауапкершілігін сезінді.
Жаттығулар "K9 Мобильді инструктор" жобасы аясында, кинологиялық даярлықты дамыту және есірткі қылмысының алдын алу мақсатында нұсқаушылардың жетекшілігімен өтті.
Кинологиялық қызмет орталығы — құрлықта да, су жағасында да, тәуекел мен белгісіздік жағдайында әрекет етуге дайын, үйлескен, дайындығы жоғары, жігерлі команда. Болашақ кинологтар өздерінің дайындығын, сенімділігін және дамуға құлшынысын көрсетті — бұл өңірдегі кәсіби мектептің өсіп келе жатқанын білдіреді.
