Талдықорған қаласына қарасты Ынтымақ ауылындағы №30 орта мектепте Жетісу облысы полиция департаментінің әкімшілік полиция басқармасының қызметкерлері оқушылар арасында жол қозғалысы мәдениетін қалыптастыруға бағытталған ерекше сабақ ұйымдастырды, - деп хабарлайды Polisia.kz.
Іс-шара дәстүрлі дәріс форматында емес, тәжірибелік негізде өтті. Жоғары сынып оқушылары жаяу жүргінші, жүргізуші және жол инспекторы рөлдерін сомдап, арнайы дайындалған алаңда түрлі жол жағдайларын сахналады. Бұл тәсіл оларға жол ережелерінің маңызын тек теория жүзінде емес, тәжірибе арқылы түсінуге мүмкіндік берді.
Сабақ барысында жол-көлік оқиғасының көріністік қойылымы да көрсетілді. Сюжет бойынша белгіленбеген жерден жолды кесіп өтпек болған жаяу жүргіншінің (манекеннің) апатқа ұшырауы қарапайым қауіпсіздік талаптарын елемеудің салдарын айқын көрсетті.
Сонымен қатар полиция қызметкерлері электрсамокаттарды пайдалану ережелеріне де ерекше назар аударып, олардың қауіпсіз қозғалыстағы рөлін түсіндірді. Оқушыларға жолда туындауы мүмкін қауіпті жағдайлар модельденіп көрсетіліп, оларды болдырмау жолдары түсіндірілді.
Практикалық бөлімнен кейін оқушылар өз әсерлерімен бөлісіп, мұндай форматтың жолдағы қауіпсіздікке деген жауапкершілікті тереңірек сезінуге ықпал ететінін атап өтті.
Мамандардың айтуынша, мұндай интерактивті сабақтар жасөспірімдерге жол қозғалысы ережелерін саналы түрде қабылдауға және қауіпсіз мінез-құлық мәдениетін қалыптастыруға үлкен әсер етеді.
