Павлодарда оқушылармен отбасылық зорлық-зомбылықтың алдын алу тақырыбында кездесу өтті, - деп хабарлайды Polisia.kz.
"Отбасындағы зорлық-зомбылықсыз Қазақстан" республикалық акциясы аясында Павлодар ауылы мектебінің түлектерімен отбасылық-тұрмыстық зорлық-зомбылықтың алдын алуға арналған маңызды кездесу ұйымдастырылды. Іс-шараны отбасылық-тұрмыстық зорлық-зомбылыққа қарсы іс-қимыл инспекторлары өткізді.
Кездесу барысында оқушыларға құқықтық сауаттылық, қауіпсіздік және қиын жағдайларда көмекке жүгіну жолдары түсіндірілді.
— Кездесудің негізгі мақсаты — отбасындағы зорлық-зомбылық туралы үнсіз қалмаудың маңызын түсіндіру. Біз оқушыларға өз құқықтарын қорғау жолдарын, заңнамада қарастырылған мүмкіндіктерді және тұрмыстық зорлық-зомбылық жасаған азаматтардың жауапкершілігін жан-жақты түсіндірдік. Егер бала үйде зорлық-зомбылыққа тап болса, ол жалғыз қалмауы тиіс. Мұндай жағдайда мұғалімдерге, мектеп психологтарына жүгіну немесе полицияға хабарласу қажет, — деді Павлодар қаласы полиция басқармасы бастығының орынбасары Бауржан Қарабаев.
Кездесу соңында оқушыларға сенім телефондары мен қолдау қызметтерінің байланыс нөмірлері таратылды. Полицейлер жоғары сынып оқушыларын айналасындағы адамдарға бейжай қарамауға шақырды. Олардың айтуынша, достары немесе сыныптастары қиын жағдайға тап болған кезде уақтылы қолдау көрсету үлкен маңызға ие.
Тәртіп сақшылары мұндай кездесулер балалардың құқықтарын қорғауға, дұрыс отбасылық құндылықтарды насихаттауға және жастарға кез келген жағдайда көмек бар екенін түсіндіруге бағытталғанын атап өтті.
Балалардың қауіпсіздігі мен психологиялық саулығы — қоғамның басты құндылықтарының бірі.
