Абай облысындағы әйелдер колониясында ашық есік күні өтті, — деп хабарлайды Polisia.kz.
Абай облысы бойынша ҚАЖ мекемесіндегі әйелдер колониясында ашық есік күні ұйымдастырылды. Бұл күнді сотталған әйелдер мен олардың жақындары ерекше толғаныспен күтті. Көпшілік үшін туғандарымен қауышу көптен күткен қуаныш болса, кейбірі үшін бұл жылдар бойғы алғашқы кездесу болды.
Іс-шара аясында 50 сотталған әйелмен кездесу үшін 80-нен астам туысы келді. Олар – бас бостандығынан айырылған жақындарына үнемі қолдау көрсетіп жүрген жандар. Көпшілігі туған адамын көру үшін жүздеген шақырым жол жүріп келді. Қашықтыққа, жас ерекшелігіне және өмірлік жағдайларға қарамастан, олар осы маңызды күнді бірге өткізуге мүмкіндік тапты.
Көптен күткен кездесуде ешкім де сезімін жасыра алмады. Қуаныштан төгілген көз жасы, құшақтасулар мен шынайы әңгімелер бұл күннің ең әсерлі сәттеріне айналды. Әркім айырылысқан уақыт ішінде болған оқиғаларды айтып, жан сырын бөлісіп, жақынының жылуын сезінуге асықты.
Әсіресе, 52 жастағы сотталған әйелдің он жылдан астам уақыт көріспеген екі әпкесімен кездесуі ерекше әсерлі болды.
— Қазіргі сезімімді сөзбен жеткізу қиын. Біз соңғы рет он жылдан астам уақыт бұрын кездескен едік. Тұрмысқа шыққаннан кейін мен басқа қалаға көшіп кеттім, әрқайсымыздың өз отбасымыз, өз тіршілігіміз болды. Ата-анамыз қайтыс болғаннан кейін арамыздағы байланыс бірте-бірте үзіліп қалды. Өмірім қиындай бастағанда, екі баламен жалғыз қалып, қиындықтарды еңсере алмай жүргенімді әпкелеріме айтуға ұялдым. Өз-өзіме тұйықталып, ең жақын адамдарыммен де байланысымды жоғалттым.
Осында келгеннен кейін балалық шағымызды, ата-анамызды, отбасылық мерекелерімізді жиі еске алатын болдым. Күн сайын әпкелерімді ойладым, бірақ ұзақ уақыт бойы алғашқы қадам жасауға батылым жетпеді. Ақыры оларға хабарласып, бар шындықты айттым. Бүгін біздің он үш жылдан кейінгі алғашқы кездесуіміз өтті. Оларды көрген сәтте, арадағы барлық жылдар бір мезетте жоғалып кеткендей болды. Біз жыладық, құшақтастық және бір-бірімізге ең маңызды сөздерді айттық. Әңгімемізде реніш те, өкпе де болған жоқ. Біз тек махаббат, отбасы және енді ешқашан бір-бірімізден ажырамау туралы сөйлестік. Бұл күн маған үміт сыйлап, бостандыққа шыққаннан кейін жақындарымның жанында жаңа өмір бастай алатыныма сенім ұялатты, — деді сотталған әйел.
— Отбасылық байланысты сақтау – адамның бостандыққа шыққаннан кейін қалыпты өмірге сәтті оралуының маңызды факторларының бірі. Мұндай кездесулер сотталғандардың туғандарының қолдауын сезінуіне мүмкіндік беріп, заңға бағынатын мінез-құлыққа және оң өзгерістерге деген ынтасын арттырады. Әртүрлі себептермен үзіліп қалған туыстық қарым-қатынастардың қайта қалпына келіп жатқанын көру біз үшін өте маңызды. Көп жағдайда отбасы адамға үмітін жоғалтпай, болашаққа жоспар құруға көмектесетін басты тірекке айналады, — деп атап өтті сотталғандар арасында тәрбие және әлеуметтік-психологиялық жұмыс бөлімінің бастығы Айнур Искакова.
