Алматы полиция департаментінде арнайы мақсаттағы бөлімшелер күніне арналған салтанатты іс-шара өтті

Алматы қаласы полиция департаментінде арнайы мақсаттағы бөлімшелер күніне арналған салтанатты іс-шара өтті, - деп хабарлайды Polisia.kz.

Іс-шара жылдам қимылдайтын арнайы жасақ базасында ұйымдастырылып, оған арнайы бөлімшелердің қызметкерлері мен ардагерлері қатысты.

Салтанатты жиын барысында қоғамдық қауіпсіздікті қамтамасыз ету ісіне қосқан елеулі үлесі, мінсіз қызметі және жоғары кәсіби шеберлігі үшін үздік қызметкерлер ведомстволық наградалармен марапатталды.

Іс-шара аясында қызметтік міндетін атқару кезінде қаза тапқан полиция қызметкерлерінің жарқын рухына құрмет көрсетілді. Қатысушылар ескерткішке гүл шоқтарын қойып, ерлікпен қаза болған әріптестерін бір минут үнсіздікпен еске алды. Салтанатты рәсім жеке құрамның саптық шеруімен аяқталды.

Шараға Алматы қаласы полиция департаментінің бастығы Айдын Кабдулдинов қатысып, арнайы мақсаттағы бөлімшелердің құқықтық тәртіп пен қоғамдық қауіпсіздікті қамтамасыз етудегі ерекше рөліне тоқталды.

- Арнайы бөлімшелердегі қызмет – күн сайынғы тәуекел, жоғары жауапкершілік және антқа адалдықтың жарқын көрінісі. Сіздер азаматтардың өмірі мен қауіпсіздігіне қатер төнген сәтте бірінші болып әрекет етесіздер. Сіздердің қажырлы еңбектеріңіздің арқасында қала тыныштығы сақталып, халықтың полицияға деген сенімі нығая түсуде. Біз бұл нысанды абыроймен киіп жүрген әрбір қызметкерді мақтан тұтамыз. Өз өмірін өзгенің амандығы жолында құрбан еткен әріптестеріміздің ерлігі ешқашан ұмытылмайды, – деді Айдын Кабдулдинов.

Алматы қаласы полиция департаментінде ұрпақтар сабақтастығын нығайту, ардагерлерге қолдау көрсету және қызметтік борышын өтеу кезінде қаза тапқан қызметкерлердің есімдерін ұлықтау ведомство қызметінің маңызды бағыттарының бірі болып қала беретіні атап өтілді.