Қостанай облысында полиция қызметкерлері жолда қиындыққа тап болған кішкентай баласы бар отбасыға көмек көрсетті, - деп хабарлайды Polisia.kz.
Кейде нағыз қаһарман болу үшін үлкен ерлік жасаудың қажеті жоқ. Қиын сәтте дер кезінде жанынан табылып, көмек қолын созудың өзі адам үшін үлкен қолдау.
Осындай жағдай Астана қаласынан Қостанайға жол тартқан отбасымен болды. Жол үстінде олардың көлігі кенеттен бұзылып, әрі қарай жүру мүмкін болмай қалған. Жағдайды қиындатқаны – көлікте кішкентай баланың болуы және тоқтаған жерде телефон байланысының болмауы. Осыған байланысты отбасы өздігінен көмек шақыра алмаған.
Дәл осы сәтте оларға полиция қызметкерлері Серік Жабағы мен Бауыржан Танбаев көмекке келді.
Тәртіп сақшылары қиын жағдайға тап болған отбасын қараусыз қалдырмай, ақаулы көлікті сүйреткіш арқанға қосуға көмектесіп, қауіпсіз жерге дейін бірге алып барған. Олардың көмегінің арқасында отбасы жолын жалғастырып, аман-есен діттеген жеріне жеткен.
Бұл сәтте кішкентай жолаушының қуанышы ерекше әсер қалдырды. Ата-анасы полиция қызметкерлерінің көмекке келген сәтін бейнежазбаға түсірген. Баланың жүзіндегі шынайы қуаныш пен жеңілдік сезімі тәртіп сақшыларының жасаған жақсылығына берілген ең үлкен баға болды.
Ал полиция қызметкерлері үшін бұл – күнделікті қызметтің ажырамас бөлігі. Қиындыққа тап болған азаматқа қол ұшын созу, оның қауіпсіздігін қамтамасыз ету және аман-есен діттеген жеріне жетуіне жәрдемдесу – полиция қызметінің маңызды бағыттарының бірі.
Жол үстінде көрсетілген бұл көмек отбасы үшін ұзақ уақыт бойы жылы естелік болып қалары сөзсіз. Ал полиция қызметкерлерінің қарапайым адамгершілігі мен жанашырлығы көпшілікке үлгі болары анық.
Қиын сәтте көмекке келіп, адам қауіпсіздігін бірінші орынға қойған полиция қызметкерлеріне алғыс білдіреміз!
