Ақмола облысында Пушкин көшесіндегі көпқабатты үйлердің бірінде түнгі мереке күтпеген жерден әкімшілік хаттамамен аяқталды, - деп хабарлайды Polisia.kz.
8 қыркүйекте сағат 00:30 шамасында полиция басқармасына көпқабатты үйлердің бірінде бір топ адамның тыныштықты бұзып жатқаны туралы хабарлама түскен.
Оқиға орнына жедел жеткен полицейлер түнгі шудың себебін анықтады. Белгілі болғандай, тұрғындардың бірі досының туған күнін атап өту үшін мерекелік басқосу ұйымдастырған.
Алайда көңілді отырыстың уақыты көршілердің тыныштығына әсер еткен. Түнгі уақытта қатты сөйлесу, музыка қосу және басқа да шулы әрекеттер айналадағы тұрғындардың демалуына кедергі келтірген.
Осыған байланысты полиция қызметкерлері іс-шараны ұйымдастырушыға қатысты әкімшілік хаттама толтырды.
Мерекенің аулаға да өзіндік "сыйы" қалған. Құттықтау барысында тұрғындар аулаға конфетти шашқан. Полицейлер мерекеден кейін қалған қоқысты тазалау күн сайын аумақтың тазалығын қамтамасыз ететін қызметкерлерге қосымша салмақ түсіретінін еске салды.
Қатысушылар полиция қызметкерлерінің ескертуін түсіністікпен қабылдап, конфеттиді жинап, ауланы тәртіпке келтірді.
Полицейлер туған күн немесе басқа да маңызды мерекелерді атап өтуге ешкім тыйым салмайтынын атап өтті. Ең бастысы – айналадағы адамдарға құрметпен қарап, заңнамада белгіленген тыныштық уақытын сақтау және қоғамдық орындарда тазалықты сақтау.
Жыл басынан бері Ақмола облысында белгіленген уақытта тыныштықты бұзғаны үшін 3 мыңнан астам азамат әкімшілік жауапкершілікке тартылған.
