Қарағанды облысындағы ауылдардың бірінде "Қауіпсіз үй" және "Заңсыз келуші" жедел-профилактикалық іс-шаралары барысында полицейлер көші-қон заңнамасын бұзу дерегін анықтады, - деп хабарлайды Polisia.kz.
Нұра аудандық полиция бөлімінің қызметкерлері үй-үйді аралау кезінде көрші мемлекеттердің бірінің 24 жастағы азаматшасын анықтады. Ол бірге тұратын азаматының үйінде тұрған. Құжаттарды тексеру барысында әйелдің Қазақстан аумағында болу мерзімі аяқталғаны және оның ұзартылғанын растайтын тиісті белгі болмағаны белгілі болды.
Сонымен қатар ерлі-зайыптылардың бір жасар қызы бар екені анықталды. Алайда балаға осы уақытқа дейін туу туралы куәлік рәсімделмеген. Анасының қолында баланың дүниеге келгенін растайтын перзентхананың медициналық анықтамасы ғана болған.
Қазақстан Республикасында болу мерзімі аяқталғаннан кейін он тәуліктен астам уақыт елден шықпағаны үшін шетелдік азаматшаға қатысты Әкімшілік құқық бұзушылық туралы кодекстің 517-бабы бойынша әкімшілік хаттама толтырылды. Іс материалдары тиісті шешім қабылдау үшін сотқа жолданды.
Полицейлер баланың құжаттарын рәсімдеу мәселесін де бақылауға алды. Бұл бүлдіршіннің құқықтарын қорғауға және тиісті әлеуметтік қызметтерге қол жеткізуіне мүмкіндік береді.
Қарағанды облысының полиция департаменті көші-қон заңнамасының сақталуын бақылаумен қатар, балалардың, әсіресе осал жағдайда қалған бүлдіршіндердің құқықтарын қорғау маңызды міндеттердің бірі екенін атап өтті.
Бұл жағдай баланың дүниеге келген сәтінен бастап оның құжаттарын уақытылы рәсімдеудің маңыздылығын тағы бір мәрте көрсетеді.
