Астанада есірткі қаупімен күресудің жаңа тәсілдері енгізілуде, — деп хабарлайды Polisia.kz.
Елордада есірткі ресурстарын анықтау және бұғаттау үшін цифрлық технологияларды белсенді пайдалану жоспарлануда. Сонымен қатар жастар арасында профилактикалық жұмыстарды неғұрлым нысаналы әрі заманауи форматта жүргізуге басымдық берілмек.
Елорда әкімдігінде қала әкімінің орынбасары Ерік Мейірханның төрағалығымен 2026 жылдың IV тоқсанына арналған нашақорлық пен есірткі бизнесіне қарсы іс-қимыл жөніндегі ведомствоаралық штабтың отырысы өтті.
Жергілікті атқарушы органдар мен полиция департаментінің өкілдері “Астана – есірткісіз қала” кешенді жоспарын іске асыру аясында атқарылған жұмыстар туралы есеп берді. Отырысқа қатысушылар қол жеткізілген нәтижелерді, өзекті мәселелерді, сондай-ақ есірткі қаупіне қарсы күрестің тиімділігін арттыруға бағытталған қосымша шараларды талқылады.
Жиынның маңызды тақырыптарының бірі есірткі бизнесіне қарсы күресте заманауи цифрлық технологияларды қолдану болды. Есірткі тарату әрекеттері интернет кеңістігіне жиі ауысып жатқандықтан, әлеуметтік желілерде, мессенджерлерде және жабық чаттарда тыйым салынған контентті анықтауға арналған жасанды интеллект негізіндегі отандық ақпараттық жүйенің таныстырылымына ерекше назар аударылды.
Әзірлеушілер интернет кеңістігіне өздігінен мониторинг жүргізетін, есірткі ресурстарын анықтайтын, олардың мазмұнын талдайтын және кейіннен бұғаттауға қажетті материалдарды қалыптастыратын бағдарламаны таныстырды.
Әзірлеушілердің айтуынша, бағдарлама ашық жарияланымдармен қатар түрлі қауымдастықтарды, боттарды және жабық интернет-платформаларды да талдай алады. Бұдан бөлек, жүйе аналитикалық есептер қалыптастырып, пайдаланушылардың белсенділігін, сұранысқа ие есірткі заттарын, олардың таралу динамикасын және заңсыз нарықтың басқа да ерекшеліктерін көрсетеді.
Отырысқа қатысушылар бағдарламаның практикалық тиімділігін және оны қолданыстағы жүйелермен интеграциялау тетіктерін де талқылады.
Талқылау барысында мектеп оқушыларына, студенттерге және жастарға ерекше көңіл бөлу қажеттігі атап өтілді. Себебі дәл осы санаттағы азаматтар есірткінің заңсыз айналымына тартылу қаупіне көбірек ұшырайды.
