Талдықорған қаласында қылмыс орын алып, қымбат ұялы телефон қолды болған, – деп хабарлайды Polisia.kz.
Кеше түнде тонаушы бойжеткенді қорқытып, қолындағы бағалы телефонын алып қашып кеткен.
– Қыз ұялы телефонынан айрылып қала жаздады. Ол өз үйінің ауласындағы дәретханадан шыққан сәтінде қылмыскерге тап болған. Қылмыстық іс материалдарына сәйкес қарақшы қолындағы пышақпен жәбірленушіні қорқытып, ұялы телефонды тартып алған. Зардап шегуші жағдайды тез пайымдап, жан-жағынан көмек сұрап, айғайға басқан, – деді Талдықорған қалалық Полиция басқармасының бастығы Асқар Нұрсапа.
Немересінің айғайлағанын естіген үйдегі атасы мен әжесі бірден полицияға хабар берген. Аз ғана уақыт ішінде қылмыстың «ізі суымай» ашылып, күдікті қолға түсті.
– Қылмыстың негізгі айғақты заты – ұялы телефонды жедел-тергеу тобы іс жүргізу тәртібімен тәркілеп, қылмыстық іс материалдарына тіркеді. Тергеу ісі полиция басқармасында жалғасты. Оқиға бойынша жауап алу кезінде тараптар толық түсініктеме берді, – деп толықтырды Асқар Нұрсапа.
Тергеушінің өтініші бойынша сот бұлтартпау шарасы ретінде қамауға алу шешімін қабылдады. Қазіргі уақытта күдікті уақытша ұстау изоляторында және көп ұзамай жасаған қылмысы үшін сот алдында жауап береді. Сондай-ақ, тәртіп сақшылары оның бұдан басқа қылмыстарға қатыстылығын тексеруде.
