Қарағандылық полицейлер 91 кг марихуана тасымалдаған ер адам ұстады, – деп хабарлайды Polisia.kz.
23 мамырда Қарағандыға кіре берісте «Соқыр» бақылау-өткізу пунктінде Қарағанды қаласы полиция басқармасының бірлескен жедел тобының қызметкерлері арнайы жасақ жауынгерлерінің қатысуымен жедел іс-шара өткізді, нәтижесінде үлкен көлемде есірткі тасымалдаушы қолға түсті.
– Полиция қызметкерлері салонында жолаушысы бар көлікті тоқтатты. Осы адамға тиесілі жүкті қарау кезінде жалпы салмағы 91 келі болатын жасыл түсті зат табылды. Сараптама оны кептірілген марихуана деп тапты. Қазақстан Республикасының Қылмыстық кодексінің 296-бабы бойынша қылмыстық іс қозғалды. Тергеу жүргізіліп жатыр, – деді облыстың ПД басшысының міндетін атқарушы Әбіл Әбілдин.
