Қарағандыда ер адам танысының есепшотынан 600 мың теңгені шешіп алды, – деп хабарлайды Polisia.kz.
27 тамызда 33 жастағы қала тұрғыны Қарағанды қаласының ПБ Орталық полиция бөліміне хабарласты. Жәбірленуші кафеде танысымен кездесіп қалған. Біраз уақыттан кейін ер адам жәбірленуші әйелден ұялы телефон сұрап, шұғыл қоңырау шалу керектігін түсіндірді. Жәбірленуші оған ұялы телефонын берді.
Көп ұзамай қайтып келген ер адам туындаған кейбір шұғыл шаруаларды шешу үшін кету керек екенін айтты. Бірдеңе дұрыс емес екенін сезген келіншек ұялы телефонын тексеріп, оның шотынан 600 мың теңге жоғалып кеткенін анықтады. Ол бұл туралы дереу полицияға хабарлады.
Қарағанды қаласының ПБ патрульдік полиция полкінің отряды күдікті 33 жастағы ер адамды ұстады. Ол кінәсін мойындады.
ҚР ҚК 190-бабы (Алаяқтық) бойынша қылмыстық іс қозғалды. Қазіргі уақытта тергеу жүріп жатыр.
