Петропавл қ. ПБ көші-қон қызметі бөлімінің жас қызметкері келушілердің ризашылығына бөленді, – деп хабарлайды Polisia.kz.
Instagram желісіндегі петропавлдық пабликтердің бірінде Петропавл қ. ПБ көші-қон қызметі бөлімі қызметкері Айгерім Иамбаеваның жұмысына қатысты алғыс сөздер жарияланды.
– Көші-қон полициясының анықтама бөлімінде тұрған жас қызға ризамын. Бірнеше мәрте келдім. Келген сайын оның кәсібилігін, адамгершілігін көремін. Бәрін егжей-тегжейлі түсіндіріп береді, – делінген.
Суреттің астында «Жалпы, барлық қызметкерлер сыпайы», «Әрқашан көмектесуге дайын», «Жарайсың» деп басқа адамдар да алғыстарын қоса жазған. Айгерім келісімшарт бойынша тамыз айынан бастап істеп келеді.
– Қысқа мерзім ішінде өзін жақсы жағынан көрсете білді, – дейді СҚО ПД Көші-қон қызметі басқармасы бастығының міндетін атқарушы Ермек Нұсырбаев. – Петропавл қ. ПБ көші-қон қызметі бөлімінде келісімшарт бойынша 12 инспектор жұмыс істейді. Оларға ерекше талаптар қойылады: адамдармен жақсы қарым-қатынас, сыпайылық, өзін-өзі дамыту және т.б. Ішкі істер министрлігімен сервистік қызмет көрсету алға қойылғандықтан, білікті кадрларды іріктеу маңызды.
Ермек Нұсырбаев атап өткендей, шетелдіктерді алғашқы болып көші-қон қызметі қарсы алады. Сондықтан, біздің республика туралы пікір көші-қон қызметкеріне қарап қалыптасады. Сыпайы, қойылған сұраққа тез жауап бере алатын білікті қызметкерлер бүгінгі заман талабы.
Қызметкерлердің жұмысына қатысты келіп түскен алғыстар олардың өз қызметтерін мінсіз және тиімді атқаруының белгісі.
