Алматы облысы полиция департаментінің ұйымдасқан қылмысқа қарсы күрес басқармасының қызметкерлері әкімдік және денсаулық сақтау саласының өкілдерімен бірлесіп, Қонаев қаласының көпсалалы колледж студенттеріне профилактикалық дәріс өткізді, – деп хабарлайды Polisia.kz.
Іс-шара "Заң мен тәртіп" тұжырымдамасы және адам мен балалар саудасына қарсы іс-қимылға, жастардың құқықтық сауаттылығын арттыруға және өз қауіпсіздігіне жауапкершілікпен қарауын қалыптастыруға бағытталған "Зорлық-зомбылықтың алдын алу" жобасы аясында өтті.
Бірінші курс студенттерінің 60-ы адам саудасының негізгі нысандары мен қауіптері, өз құқықтарын қорғау тәсілдері, сондай-ақ жұмысқа орналасу, басқа өңірлерге және шетелге шығу, интернетте бейтаныс адамдармен қарым-қатынас жасау кезінде сақтық шаралары туралы ақпарат алды.
Денсаулық сақтау және әлеуметтік қорғау салаларының өкілдері зорлық-зомбылықтың алдын алу, психологиялық қауіпсіздік және құқықтары мен бостандықтарына қауіп төнген жағдайда дер кезінде көмекке жүгінудің маңызы туралы түсіндірді.
Іс-шара соңында студенттерге пайдалы ұсынымдар қамтылған ақпараттық буклеттер таратылды.
